Serbët e cilësuan si një provokim shqiponjën e Gjon Muharremajt në “Eurovision”. Lidhur me të gjitha këto zëra keqdashëse, Gjon’s Tears ka zgjedhur që të reagojë dhe ti japë një ‘shuplakë’ të fortë të gjithë kritikëve.
Shqiptari që përfaqësoi Zvicrën këtë vit në “Eurovision”, fitoi vendin e tretë në natën finale, ndërkohë që nga juria profesioniste grumbulloi pikët maksimale. Ai mori edhe mbështetjen e Shqipërisë, duke marrë 12 pikë prej vendit tonë.
Në momentin e dhënies së pikëve, Gjoni bëri shqiponjën dykrenare. Një gjest që shkaktoi revoltën e hapur të serbëve. Në lidhje me këto sulme, ka reaguar edhe Gjoni. Ai është shprehur se ky ishte një gjest, për të shprehur falenderimet ndaj Shqipërisë, pasi shqiponja dykrenare është simboli i Shqipërisë.
Babai i Gjonit është me origjinë nga Kosova, ndërsa nëna e tij nga Shqipëria, dhe nuk kishte si të ndodhte ndryshe, ku të vinte edhe një përshëndetje në këtë formë. “Nuk e kuptoj shqetësimin. Unë doja thjesht të falenderoja Shqipërinë. Shqiponja dykrenare është simbol i Shqipërisë. Ju keni qëndruar gjithmonë pas meje… keni qenë gjithmonë krenarë për mua. Jam shumë i lumtur për këtë gjë, dhe kjo ishte mënyra ime e falenderimit”, është shprehur Gjoni.
