Këngëtarja e njohur, Dua Lipa i ka bërë një kërkesë publike Presidentes së Komisionit Europian, Ursula von der Leyen, për liberalizimin e vizave për Kosovën.
Teksa pranoi Çmimin e Lidershipit të Dalluar nga Këshilli i Atlantikut, këngëtarja tha se të gjitha kriteret janë përmbushur dhe Komisioni Evropian e ka rekomanduar liberalizimin e vizave mbi tre vjet më parë.
“Të rinjtë luftojnë për të gjetur punë dhe mundësitë e tyre pengohen nga kufizimet që e bëjnë të vështirë udhëtimin për punë ose për kënaqësi. Pasi kemi përmbushur të gjitha kriteret, Komisioni Evropian në fakt ka rekomanduar liberalizimin e vizave për Kosovën për më shumë se tre vjet më parë. Pra, a mendoni se ne mund ta arrijmë atë tani?.
Kosova është edhe shteti më i ri në Evropë. Janë vetëm 13 vjet të shkurtra në rrugëtimin tonë të pavarësisë. Dhe si pjesë e një komuniteti të fortë ndërkombëtar, ne do të lulëzojmë emocionalisht. Ne do të lulëzojmë ekonomikisht dhe kulturalisht. Është në gjenet tona.
A nuk do të ishte e përshtatshme nëse Kosova mund të zinte vendin e saj brenda atij bashkimi paqësor, të lulëzonte ekonomikisht përkrah fqinjëve dhe të shëronte lëndimin nga konflikti i fundit?”,- tha artistja.
Pas fjalimit të saj, Dua ftoi në skenë Presidenten Vjosa Osmani.
“Me këtë vizion në mendje, e pranoj këtë çmim me mirënjohje për të gjithë të rinjtë e Kosovës. Dhe për ta marrë atë në emër të tyre, dëshiroj të ftoj në skenë lideren e re të Kosovës, Shkëlqesinë e Saj, Presidente Vjosa Osmani”,- tha këngëtarja shqiptare.
