Kreshnik Begu
Kohët e fundit po dëshmojmë një fenomen sa të dhimbshëm, aq edhe alarmant për shoqërinë tonë shqiptare. Është e mjerueshme të shohësh se si njeriu sot vepron pa njohur asnjë kufi moral e njerëzor. Nuk ka më rëndësi nëse diçka është mëkat apo pabesi; synimi i vetëm ka mbetur paraja dhe pushteti individual. Për të arritur këtë, krijohen turma me interesa të njëjta që tentojnë të ulin e të nënçmojnë këdo që ka të drejtë, që ka moral apo që lufton për vlera të vërteta në këtë botë. Sot, paraja është vendosur mbi çdo gjë.
Nuk bëhet fjalë për të mohuar rëndësinë ekonomike të parasë, por problemi qëndron te mënyra se si ajo përdoret dhe te efektet shkatërruese që ka mbi psikologjinë e papërgatitur dhe të dobët të individit.
Shqiponja: Nga simbol i shenjtë, në mjet për “show”
Më e keqja është se simbolin tonë kombëtar, shqiponjën, sot e sheh kudo. Për fat të keq, te shumë individë ajo përdoret thjesht për dukje dhe “show”. Shqiponja nuk është një kukull apo një aksesor mode për t’u mbajtur nëpër duar pa asnjë kuptim. Ajo është një simbol i shenjtë dhe shumë i lashtë. Ajo përfaqëson aftësinë për të bërë bashkë individët rreth të drejtës, për të bërë drejtësi në kuvende.
Kur në një shoqëri nuk ka më kuvende ku debatohet me thelb drejtësinë dhe ku nuk ndëshkohet e padrejta, kjo simbolikë përdhoset. Është e rëndë kur e mban në dorë një individ pa norma dhe pa moral. Kjo “sëmundje” po përhapet pak nga pak, duke e kthyer qimen në tra, ashtu siç thotë me mençuri populli.
Drejtësia: Shtylla e rrënuar që nga familja deri te shteti
Drejtësia, pranimi i së vërtetës dhe zbatimi i saj janë shtyllat më të rëndësishme të një shoqërie. Nëse nuk ka drejtësi – duke filluar që nga familja e thjeshtë ku ndahen detyrat dhe përgjegjësitë për çdo anëtar, e deri te kreu më i lartë i shtetit – ajo shoqëri është e dështuar. Një komb pa drejtësi kthehet në një pre të lehtë për çdo “kafshë të egër” që ekziston në xhunglën e kësaj bote.
Ka kaluar një kohë e gjatë që nga shpallja e Pavarësisë, dhe përgjatë historisë sonë njerëzit më të mençur, me më shumë vlera dhe më të ditur, janë vrarë e persekutuar – herë hapur e herë në pabesi. Si pasojë, hapësira u është lënë individëve që po e bëjnë shqiptarinë dhe Shqipërinë më të vogël çdo ditë e më shumë. Sot nuk prodhohet vlerë, por importohet çdo lloj paudhësie. Është e dhimbshme që në vendin tonë të shtrenjtë, ata që mbajnë gjallë dritën e dijes dhe moralit, shpesh shahen, dhunohen dhe persekutohen.
Ky është një moment reflektimi për të gjithë ne. A do të vazhdojmë të lejojmë që paraja dhe antivlera të na zvogëlojnë si komb, apo do të gjejmë forcën t’i kthehemi rrënjëve të drejtësisë dhe respektit për simbolet që na bëjnë këta që jemi?
Të shikojmë pak pas në historik ,nëse Mbreteëresha Ilire Teuta të mos ishte tradhëtuar nga Demeter Fari kush do të ishte emri i vendit tonë Shqipëri apo Gadishulli Ilirik …
