Presidenti i Republikës së Shqipërisë, Ilir Meta, ka vlerësuar tenorin e famshëm botëror, Plácido Domingo, me titullin “Kalorës i Urdhrit të Skënderbeut”, në nderim dhe mirënjohje ndaj tenorit të jashtëzakonshëm me famë ndërkombëtare, i cili ka shkëlqyer me interpretimet e tij virtuoze në skenat operistike të mbarë botës.
“Me përulje të thellë për shembullin frymëzues, fisnik dhe artistik, duke na nderuar me praninë dhe interpretimin e tij të paharrueshëm në skenën e Teatrit Kombëtar të Operës së Baletit dhe Ansamblit Popullor Shqiptar”, ka thënë presidenti Meta.
Në fjalën e tij përshëndetëse drejtuar maestro Domingos, artistëve dhe personaliteteve të artit dhe muzikës, të pranishëm në ceremoninë e dekorimit, presidenti Meta, siç raportojnë mediat në Shqipëri, u shpreh se “ceremonia e sotme është një event i veçantë, pasi i kushtohet një prej personaliteteve më të shquara ndërkombëtarisht, një prej ikonave të gjalla të artit dhe muzikës botërore, tenorit të njohur Plácido Domingo”. “Muzika i jep shpirt universit, i jep krahë mendjes, i jep fluturim imagjinatës dhe i jep jetë gjithçkaje”, ka cituar presidenti Meta filozofin grek Platonin.
“Publiku është pjesë e jetës sime reale. Atmosfera e teatrit është oksigjeni im”, citohet të ketë thënë Domingo, i cili bashkë me sopranon e shquar shqiptare, Ermonela Jaho, interpretuan të mërkurën mbrëma një gala-mbrëmje me rastin e inaugurimit të rikonstruktimit të Teatrit të Operës dhe Baletit në Tiranë.
Presidenti Meta ka thënë se është privilegj i veçantë që ta vlerësojë sot një figurë kaq madhore dhe të rëndësishme të muzikës dhe operës botërore duke i akorduar atij titullin e lartë “Kalorës i Urdhrit të Skënderbeut”.
“Nuk mund të gjenim një titull më të mirë vlerësimi, që mban emrin e heroit tonë kombëtar, i cili vazhdon edhe pas kaq shekujsh të jetë frymëzim për rrugën evropiane të Shqipërisë”, përfundoi Meta.
