Teksa Inspektori i Lartë i Drejtësisë, Artur Metani, ka urdhëruar nisjen e hetimit disiplinor ndaj kryetares së Gjykatës së Elbasanit pas disa videove të postuara në rrjetin social “TikTok”, ka ardhur një reagim edhe nga vetë kryegjyqtarja Enkeleda Kapedani.
Në disa video të përzgjedhura dhe të publikuara nga vetë ajo ne platformën Tik Tok, kryetarja e Gjykatës së Elbasanit shihet në momente aspak të përshtatshme dhe abuzimi me zyrën në orarin e punës.
Mësohet se kryegjyqtarja e Elbasanit ka mohuar të ketë shpërndarë vetë videot në “Tik Tok” ndërsa shton se dikush i ka keqpërdorur imazhin dhe emrin e saj.
Më tej ajo ka shtuar se ky është një skenar i përgatitur për t’i prishur imazhin, ndërsa u bën thirrje organeve të zbardhin ngjarjen.
Kapedani shprehet se nuk ka përdorur kurrë rrjete sociale.
Reagimi i Kryetares së Gjykatës së Elbasanit: Nuk kam Tik Tok, nuk kam përdorur kurrë rrjetet sociale. Dukush ka përdorur emrin dhe fotot e mia. Është skenar për të prishur imazhin tim. I bëj thirrje organeve të hedhin dritë për personat që kanë keqpërdorur imazhin tim.
