E premte, 24 Maj, 2024
Kontakt: info@usalbanianmediagroup.com

Studentët e UP-së hynë në top 3-shen e garës më prestigjioze të drejtësisë në botë

Ekipi i Fakultetit Juridik të Universitetit të Prishtinës, i përbërë nga gjashtë studentë, ka hyrë në top 3-shen e garës më prestigjioze të drejtësisë në botë, “Willem C Vis”.

Presidentja Vjosa Osmani e ka quajtur sukses historik rezultatin e këtyre studentëve.

Ajo ka thënë se ekipi pjesëmarrës i fakultetit juridik të UP-së ka arritur në top treshen më të mirë në garën ku morën pjesë rreth 400 universitete.

“Këto vajza e djem nga Kosova kanë lënë prapa Universitete si Harvardi, Yale, Stanford, Columbia, Oxford, Cambridge, Princeton, Duke, LSE, e qindra universitete të tjera në garën më prestigjioze të drejtësisë, Willem C Vis. Ata po ashtu fituan çmim të veçantë për Memorandumin për palën e paditur.Ky ekip këtu në foto dëshmon se vetëm me punë e përkushtim arrihet gjithçka. Krenare sa më s’ka”, ka shkruar ajo në Facebook.

Osmani tutje ka uruar studentët pjesëmarrës: Ariana Rexha, Dea Fetiu, Morea Pula, Melisë Sejdiu, Nol Musa, Rea Hadri, si dhe trajnerët: Prof. Donikë Qerimi, Ilir Hajraj dhe Art Sylaj.