Duke marrë shkas nga shifrat e ulëta të infektimeve në javët e fundit si dhe uljen e numrit të vdekjeve për shkak të Covid-19, Komiteti Teknik i ekspertëve ka vendosur që ditën e sotme të lehtësojë masat kufizuese për shkak të pandemisë.
Duke nisur nga dita e sotme, datë 1 qershor, maska nuk është më e detyrueshme në ambientet e jashtme, por do të vazhdojë të mbahet më ambientet e mbyllura.
Ndërkohë ora policore shtyhet me një orë. Pra, nga sot, ora policore do të nisë në orën 23:00 deri në orën 06:00. Ndërsa duke nisur nga 1 korriku, një muaj më vonë, ora policore do të nisë në orën 00:00 e do të përfundojë në orën 06:00.
Masat që lehtësohen:
Nga 1 Qershori:
• Hiqet detyrimi për mbajtjen e barrierës mbrojtëse në ambientet e jashtme. Do vijojë të mbetet detyrimi i mbajtjes së maskës në ambientet e mbyllura si dhe në mjetet e transportit publik. Rekomandohet mbajtja e maskës kudo ku nuk mund të ruhet distancimi social si edhe për ata që ende nuk kanë bërë dy dozat e vaksinës që konsiderohen persona në risk.
• Ora policore shtyhet në orën 23:00 – 06:00.
Klubet e natës, diskot, vijojnë të mbeten të mbyllura. Muzika do të lejohet deri në orën 22:00.
Nga 15 Qershori:
• Grumbullimet në ambientet e jashtme nga 10 persona bëhen 50 persona, duke respektuar rregullat e distancës sociale në zbatim të protokolleve të ISHP.
