Ambasadori i Shqipërisë në Mbretërinë e Bashkuar, Qirjako Qirko deklaroi në një intervistë për të përditshmen “The Guardian” se nëse qeveria britanike do të ketë nevojë, Shqipëria ka gati 5 mijë shoferë për ta ndihmuar atë për daljen nga kriza e karburantit.
Qirko theksoi se janë më shumë se 150 mijë shqiptarë që jetojnë në Mbretërinë e Bashkuar dhe që mund ta ndihmonin qeverinë të kapërcejë problemin edhe pa pagesë.
“Shqiptarët në Mbretërinë e Bashkuar do të punonin falas për këtë vend për shkak të asaj që Mbretëria e Bashkuar ka bërë për ta… Ne i jemi mirënjohës përgjithmonë qeverisë dhe ushtrisë së këtij vendi, për atë që bënë për vëllezërit tanë në Kosovë”,tha Qirko.
“The Guardian” shkruan në artikullin e saj se meqenëse një numër i konsiderueshëm besohet të jetë i padokumentuar, është e pamundur të dihet se sa janë shoferët e kualifikuar të kamionëve.
Qirko, ndërkaq, u bëri thirrje britanikëve që t’i shikojnë shqiptarët si një pasuri dhe jo si një problem.
Referuar një studimi të Shoqatës së Transportit Rrugor (RHA), vlerësohet se në Mbretërinë e Bashkuar ka një mungesë prej më shumë se 100 mijë shoferësh të kualifikuar.
Por nga ana e tij, Kryeministri britanik Boris Johnson deklaron se nuk do të lejojë rikthimin e “emigracionin e pakontrolluar” për të zgjidhur krizën e karburantit, gazit dhe ushqimeve për Krishtlindje, duke deklaruar se tendosje të tilla janë pjesë e rregullimeve në periudhën post-Brexit.
“Rruga përpara për vendin tonë, nuk është vetëm të tërheqë levën e madhe të emigracionit të pakontrolluar dhe të lejojë një numër të madh njerëzish të bëjnë punë. Pra, ajo që nuk do të bëj është të kthehem në modelin e vjetër të dështuar të pagave të ulëta të mbështetura nga emigracioni i pakontrolluar”, deklaroi lideri britanik.
Nëntë muaj pasi Britania përfundoi daljen e saj nga Bashkimi Evropian, Jonhson deklaroi në një intervistë për BBC se është i përgatitur për atë që ai e ka cilësuar si një ekonomi e lirë dhe më e mirë për vendin.
Qeveria britanike ka angazhuar 200 pjesëtarë të ushtrisë, 100 prej të cilëve shoferë për dërgimin e karburanteve nëpër stacionet e naftës, që mendohet të ndikojë në zbutjen e krizës, që ka ardhur si mungesë e shoferëve.
