Eksperti i çështjeve të Ballkanit, David Philips, ka analizuar votimin në Parlament për shkarkimin e presidentit Meta, duke e theksuar se u votua nga një Kuvend pa opozitë, por se tashmë ka ardhur koha që brezi i vjetër i politikanëve në vend të hapë rrugën.
Në një intervistë për Euronews Albania, Philips u shpreh se duhet të pritet se cila do të jetë vendimmarrja e Gjykatës Kushtetuese, e cila ka një peshë specifike në këtë çështje.
“Vota për shkarkimin u krye nga një Parlament pa opozitë. Ne nuk i dimë faktet bazike për akuzat ndaj presidentit Meta dhe nuk e dimë se si Gjykata Kushtetuese do ta vlerësojë vendimin e djeshëm.
Por ajo që dimë është se Shqipëria duhet të jetë një vend i pastër, të ketë një qeverisje të mirë.
Është koha që vendi të ecë përpara dhe që brezi i vjetër i politikanëve të hapë rrugën. Ilir Meta është pjesë e këtij brezi dhe është koha për një ndryshim.
Presidenti Meta ka caktuar 3 anëtarë të Gjykatës Kushtetuese, të cilët jam i bindur se do të përpiqen që ta mbrojnë. Por gjithsesi ka rëndësi se çfarë gjykata do të thotë, sepse sundimi i ligjit është i rëndësishëm”, u shpreh David Phillips.
Për profesorin e Marrëdhënieve Ndërkombëtare pranë Universitetit të Columbias në SHBA, përplasja pas zgjedhjeve të 25 prillit është një formulë e re konflikti, dhe palët duhet të gjejnë rrugët për të ecur përpara.
“Është një formulë për konflikte të tjera në Shqipëri. Jam i sigurt se ka disa shqetësime të besueshme për mënyrën e mbajtjes së zgjedhjeve, për blerjen e votës, por nuk dimë nëse ka një komision hetimor për të përcaktuar faktet. Ne duhet të ecim përpara, vendi s’mund të qëndrojë kështu”, tha z. Philips.
Sa i përket çështjes së negociatave, z. Philips deklaroi se tashmë ka ardhur koha që procesi të mos zvarritet më as për Shqipërinë dhe as për Maqedoninë e Veriut.
“Këto probleme janë qesharake. Është koha që vendi të shkojë mirë me fqinjët, të ecë drejt paqes dhe prosperitetit, që Shqipëria dhe Maqedonia e Veriut të gjejnë terren të përbashkët dhe të bashkëpunojnë. Përse duhet të bllokohemi në këto konflikte dhe debate”, tha David Philips.
Duke komentuar negociatat që pritet të nisin mes Kosovës dhe Serbisë, profesori David Philips u shpreh i sigurt se nëse do të ketë negociatat të ndershme, do të ketë njohje reciproke mes dy vendeve, duke vlerësuar rolin që do të kenë SHBA dhe BE në këtë proces.
“Nëse do të jenë negociata të ndershme, Serbia do të njohë Kosovën si vend të pavarur dhe sovran me kufijtë aktualë. Ajo duhet të japë sqarime për personat e zhdukur dhe nëse duhet të paguhet një dëmshpërblim, Serbia duhet ta ofrojë atë.
Këto negociata vazhdojnë prej vitesh. Jam ngopur me çështjet e diplomave dhe licencave, le të shkojmë tek çështjet thelbësore, le t’i analizojmë ato. Nëse Serbia dëshiron të integrohet në institucionet euro-atlantike, ajo duhet të zgjidhë çështjen e Kosovës.
SHBA kanë aftësinë që t’i bëjë gjërat të ndodhin, nëse punohet ngushtë me BE-në do të arrihet një marrëveshje, ndërsa nëse i lëmë gjërat siç janë, atëherë vetëm sa do të lëvizim ujërat dhe nuk do të arrijmë asnjë progres për një të ardhme të afërt”, u shpreh z. Philips.
