Në kulmin e debatit që ka përfshirë gjithë Europën për efikasitetin e vaksinës Astrazeneca, pasditen e djeshme është mbledhur Komiteti i Imunizimit dhe Vaksinimit në vendin tonë.
Në fund të mbledhjes, Komiteti i Imunizimit vendosi “vazhdimin e vaksinimit kundër coronavirusit me vaksinën anglo-suedeze”.
Vaksinimi me ‘AstraZeneca’ ka nisur në vendin tonë prej disa ditësh dhe aktualisht po injektohet te mësuesit.
Ndërsa ndiqte nga afër vaksinimin në Durrës një ditë më parë kryeministri Rama tha se pavarësisht se disa vende të BE-së kanë pezulluar vaksinimit me AstraZeneca në shumë vende të tjera ky procesin vijon ndërsa zhvillimet e fundit i cilësoi si luftë tregtare.
“Nuk kanë asnjë faj njerëzit që shqetësohen nga lloj-lloj lajmesh dhe lloj-lloj lëvizjesh që mund të kenë 1001 arsye. Kjo është luftë e madhe për jetën por është edhe luftë e madhe tregtare. Nuk e kanë ndërprerë vaksinimin, Polonia, Hungaria, Çekia, Sllovakia, Kroacia, Serbia, Kanadaja, Belgjika kishte konfirmuar sot prapë që do të vazhdojë, sepse nuk ka asnjë evidencë shkencore dhe nuk mund të ndalojmë vaksinimin thjeshtë për një dyshim që lidhet me një seri tjetër dhe të gjithë, edhe pjesa që ka bërë pezullimin, po presin konfirmimin e OBSH dhe të EMA, që deri tani ka konfirmuar vetëm vlerën e vaksinës dhe kur të thonë ndalojani do e ndalojmë”, deklaroi Rama.
Ndërkaq sa u përket shifrave mbi pandeminë, në 24 orët e fundit në vendin tonë është shënuar rritje e numri të viktimave.
Sipas Ministrisë së Shëndetësisë në 24 orët e fundit kanë humbur jetën 17 të infektuar, nga 15 viktima që ishin një ditë më parë. Ndërkohë, ka një rënie të infektimeve, kanë rezultuar pozitivë 475 qytetarë, nga 3005 testime të kryera. Në spitalet COVID në Tiranë dhe ato ne rrethe po trajtohen 445 pacientë, 31 në terapi intensive, nga të cilët 17 pacientë janë të intubuar.
