Alem Toska është skulptor që vazhdon trashëgiminë artistike të babait të tij. Ai krijon vepra në gips dhe bronz, duke sjellë figurat njerëzore në jetë. Toska ka nisur rrugëtimin e tij si skulptor që kur ishte femije, duke mësuar zanatin nga babai i tij.
“Kam filluar si skulptor që në moshën 10-vjeçare, kur shikoja babanë tim të gërryente gur, pasi ai është skulptor autodidakt. Aty më lindi pasioni për të realizuar skulptura. Më pas vazhdova studimet në Liceun Artistik në Fier dhe, pasi përfundova liceun, vazhdova universitetin. Frymëzohem kryesisht nga figura e njeriut, sepse është e bukur për t’u realizuar në skulpturë”, u shpreh ai.
Një nga veprat më të veçanta të tij është përkrenarja e Gjergj Kastriot Skënderbeut.
“Kjo është përkrenarja e Gjergj Kastriot Skënderbeut, një vepër që kam përpjekur ta realizoj sa më identike. E pëlqej shumë sepse ndihem shqiptar kur e shoh të vendosur në zyrë ose në shtëpi. Skulptura peshon rreth 6-7 kg. Unë e kam dorëzuar në Muzeun e Armëve, pasi ishte dëshira ime ta bëja një dhuratë për fëmijët, që të njihen me historinë tonë. Për ta realizuar këtë vepër më duhen 2-3 muaj pune”, shtoi ai.
Pasioni i tij për figurën e njeriut dhe lëvizjen e qëndrimeve e bën veprën të gjallë, duke shmangur statikën.
“Më pëlqejnë kompozimet dhe qëndrimet që nuk janë statike, por që japin ndjesinë e lëvizjes. Një shembull është nudja që kam realizuar këtu, e cila duket sikur po qëndron e menduar, duke pritur dikë, dhe e kam titulluar ‘Pritja’. Materialet që përdor janë të ndryshme: kryesisht balta, pastaj gipsi dhe në fund bronzi për realizime në fonderi.
Nudot kanë marrë më shumë interes kohët e fundit; dikur nuk kishte shumë njerëz që dëshironin të blinin, por sot vepra ime është parë dhe vlerësuar më shumë. Arti në bronz është një luks, sepse është një material që jeton pafundësisht dhe është goxha i kushtueshëm, por një vepër e tillë mund të jetojë mbi 3,000 vjet.
Kjo është një vepër që po realizoj aktualisht; personi që kam portretizuar nuk jeton më. Vepra është ende në fazën e stukimit dhe nuk është përfunduar. Do të më duhen rreth një muaj për ta realizuar plotësisht.”
Kjo është skulptura ‘Djali me llastiqe’. Sot fëmijët nuk luajnë më me këto lojëra, prandaj skulptura synon të sjellë një ndjesi nostalgjie për kohët e shkuara – kjo ka qenë qëllimi im. Skulptura mund të peshojë rreth 60 kg. Unë jam rritur në Mallakastër, ku nuk ka shumë skulptorë, ndaj mendoj se kjo e bën punën time edhe më të veçantë”, tha ai.
Alem Toska është shembull i një mjeshtri që kombinon traditën familjare, pasionin për artin dhe aftësinë për të krijuar vepra që ruajnë historinë dhe frymëzojnë brezat e rinj.
