Gjatë ndërhyrjes së tij telefonike në emisionin ‘Opinion’ të Blendi Fevziut, Kreu i Partisë Demokratike, Lulzim Basha ka dënuar ashpër dy emisionet e Klan dhe Top Channel.
Sipas Bashës, ata kanë dezinformuar se në protestë do ketë dhunë, ndaj Basha u bëri thirrje shqiptarëve të vijnë pa frikë bashkë me familjarët e tyre, pasi edhe ai vetë do të jetë prezent me dy vajzat e tij.
“Këtë ndërhyrje telefonike nuk kisha ndërmend ta bëja, por u shtyva nga një zinxhirë ngjarjesh. Duke shprehur vlerësimin për transparencën që ka bërë emisioni juaj për ngjarjet e fundit në vend, nuk mund të mos dënoj me ashpërsinë më të madhe, veglat qorre në tv Klan, siç është emisioni ‘Stop’, apo emisioni tjetër i Top Channel, që i janë bashkuar korit të sorrave të qeverisë për të përhapur panik për të premten.
U them injorohuni këto vegla qorre pasi janë në shërbim të qeverisë. Kjo tregon panikun që ka kapur Ramën dhe arsyeja është se regjimi i tij ka marrë fund në cdo kancelari të perëndimit. Asnjë shqiptar i ndershëm që të mos jetë i shokuar se çfarë bande kriminale kemi sot në krye të vendit.
Unë nesër do dal në protestë me dy vajzat e mia, u bëj thirrje të gjithë shqiptarëve që të vijnë me familjet e tyre, nuk do ketë asgjë që të kërcënojë një fije floku të qytetari. Rama është në grahmat e tij të fundit politike. Fundi i tij do vuloset në protestë madhështore”, tha Basha.
I pyetur nga Fevziu se çfarë do ndodhë më 30 qershor, Basha deklaroi se zgjedhje nuk do të ketë.
“Nuk do ketë zgjedhje pasi në Fletore Zyrtare është botuar dekreti i presidentit që shfuqizon këtë ditë zgjedhjesh. Çdo proces farsë nuk do ndodhë dhe nuk do njihet nga askush”, tha kryedemokrati.
