Mjeshtri i fyellit dhe këngës labe bëhet pjesë e kolonës zanore të filmit Odyssey.
Tradita muzikore e Labërisë është bërë pjesë e kolonës zanore të një produksioni të ri kinematografik, përmes interpretimit të një prej mjeshtërve të fyellit dhe cules dyjare. Vendim Kapaj rrëfen se bashkëpunimi nisi pasi kompozitori Ludwig Goransson ishte njohur me interpretimet e tij në rrjetet sociale dhe në emisione televizive, duke e ftuar të kontribuonte me muzikën tradicionale.
Për realizimin e kolonës zanore u punua për disa orë në ambientet e Teqesë së Kuzum Babait, ku u zhvilluan edhe një pjesë e xhirimeve. Sipas artistit, pjesët muzikore janë marrë nga fondi i traditës dhe përcjellin shpirtin e Labërisë, tingujt e natyrës, jetën në male, mallin, dhimbjen dhe gëzimin e banorëve të kësaj treve.
Në kolonën zanore kontribuojnë edhe zërat e grupit polifonik të Labërisë, me artistë të njohur të këngës labe, duke i dhënë filmit një identitet të fortë folklorik dhe autentik.
Për interpretuesin, pjesëmarrja në këtë projekt përfaqëson realizimin e një ëndrre të hershme. Ai shprehet krenar që përmes muzikës së fyellit dhe cules ka mundur të promovojë kulturën dhe traditën e Labërisë në një vepër kinematografike, duke e çuar atë përpara publikut shqiptar dhe ndërkombëtar.
Premiera e filmit do të shfaqet në Tiranë, ndërsa artisti shprehet se do të jetë i pranishëm për ta ndjekur nga afër këtë moment të veçantë të karrierës së tij.
