Pas kërkesave të komunitetit LGBT për të ndryshuar emrin nënë dhe baba në ‘prindi 1’ dhe ‘prindi 2’ dhe për të regjistruar fëmijët që vijnë nga një bashkëjetesë e një cifti te së njëjtës gjini në institucionet shtetërore, avokatja Margarita Kola në intervistë për Fax News u shpreh se nuk ekziston një ligj i tillë dhe nuk mund të kryhet kjo procedurë.
“Kur nuk kemi të miratuar një legjislacion të tillë atëhere të gjitha të drejtat që ky komunitet kërkon për regjistrimin e fëmijëve nëpër institucione nuk do të njihen. Nëse shkon në gjykatë duhet një baze ligjore, mund të regjistrohet si fëmijë nga njëra partnere në rastin kur janë dy lesbike por jo si fëmijë ligjor i dy partnereve.”
E pyetur nga gazetarja se a është koha e duhur që të miratohet një ligj i tillë avokatja u përgjigj se diskutimi duhet shtruar se a është shoqëria gati për një ligj të tillë dhe më pas mund të shqyrtohet momenti i duhur.
“Nuk ka një ligj për regjistrimin e nje fëmije me prindër të së njëjtës gjini dhe rrjedhimisht nuk mund të bëhët regjistrimi. Ka legjislacione të ndryshme në botë, ato shtete që kanë njohur martesën mes sekseve të njëjta kanë përcaktuar mënyrën si ndodh i gjithë procesi dhe kanë modelet e tyre se si i regjistrojnë fëmijët. Nuk ka rendësi emërtimi por duhet të kapemi me thelbin, nuk mund të bëhet një certifikatë në gjendjen civile kur nuk ka një legjislacion.”.
Pyetjes së gazetares se cfarë qëndrimi mban për deklaratat e fundit të këtij komuniteti Kola u shpreh se ata kanë të drejta por qasja duhet të vijë në momentin që ka një bazë ligjore dhe të adresohet në bazë të një ligji ekzistues.
“Qasja e tyre duhet të vijë nga një bazë ligjore jo të adresohet regjistrimi pa bazë. Edhe fëmijët e nje cifiti heteroseksual kanë rregulla të caktuara në momentin që regjistrohen, ka akte administrative për tu regjistruar dhe nuk mund të kryhet procesi në atë lloj forme.
Për një fëmijë që vjen nga një bashkëjetesë që nuk është e njohur, pra e një cifti të së njëjtës gjini nuk mund të kryhen këto lloj procedurash dhe Institucionet nuk po bëjnë gabim që refuzojnë regjistrimin. Mua nuk më shqetëson ky fakt se si do i quajmë, por duhet ditur se në shoqërinë postmoderne të drejtat e pakicave mund të jetizohen edhe në legjislacione që mbrojnë shumicën, gjithmonë pa i cenuar ato.
Të drejtat e tyre duhet të jenë brenda ligjeve aktuale, nuk mund të shpikim ligje që bien ndesh më shumicën, nuk është e drejtë të quhen prindi një e prindi dy sepse e drejta e pakicës mbaron aty ku fillon e drejta e shumicës.
Shqipëria nuk e njeh këtë martesë, është në këtë kuadër ligjor dhe nuk mund të përfitojnë nga paligjshmëria dhe të kryejnë një tjetër paligjshmëri. Nuk mund të rregullojmë një grup e të mohojmë grupin tjetër, dhe mendoj se është problem që i përket së ardhmes. Nëse miratohet ligji do të miratohet një gjë e tillë”- përfundoi avokatja Kola.
