Akuzat për një financim të mundshëm të PD prej gjysëm milion dollaresh të ardhura nga Rusia përmes kompanive offshore e të përdoruara per lobim, që në 2017 erdhën si akuza politike, pushtuan këtë të mërkurë mediat kryesore të botës.
BBC, AFP, Washington Post apo Zeri i Amerikës publikuan të dhëna të një raporti të Komunitetit Amerikan të Zbulimit, i cili u konfirmua nga një zyrtar i lartë i qeverisë së SHBA.
Ne raport thuhet se Rusia ka dhënë fshehurazi mbi 300 milionë dollarë për parti politike dhe kandidatë në dhjetëra vende, që nga viti 2014 mes të cilave dhe Partinë Demokratike të drejtuar në atë periudhë nga Lulzim Basha.
“Në Shqipëri, Rusia i dha rreth gjysmë milioni dollarë Partisë Demokratike në 2017 përmes kompanive fantazëm”, tha burimi i qeverisë amerikane.
Sipas zyrtarit që nuk ka pranuar të identifikohet, raporti ka analizuar financimet e Rusisë “në mbi 24 vende gjatë viteve të fundit në një përpjekje për të manipuluar demokracitë nga brenda. Ne prononcimin e tij, zyrtari amerikan ka paralajmëruar forcat politike që kanë pranuar këto financime se do t’i ekspozojnë emrat e tyre.
“Ajo që është më tronditëse për këtë studim është se shohim praninë e financimit të fshehtë rus në mbarë botën… Po i paralajmërojmë këto parti të huaja dhe kandidatë se nëse pranojnë fshehurazi paratë e Rusisë, ne kemi mundësinë t’i ekspozojmë, dhe do t’i ekspozojmë”, shtoi ai.
Zëri i Amerikës thotë se burimi nuk dha hollësi të mëtejshme për rastin e Shqipërisë. Por ajo kujton se viti 2017, emri i Partisë Demokratike dhe shifra e përmendur prej 500 mijë dollarësh përkojnë me hetimet që u zhvilluan në atë ndaj PD-së bazuar në deklarimet që kishte bërë firma lobuese amerikane ‘Muzin Capitol Partners’, se kishte marrë gjithsej tre pagesa, në një shumë prej 675 mijë dollarësh, për punën e saj në favor të Partisë Demokratike në vitin 2017.
Hetimet nisën pasi revista amerikane Mother Jones ngriti dyshime se pas një pjese të pagesave të bëra nga “Biniatta Trade” me bazë në Skoci, qëndronin biznesmenë rusë.
Prokuroria i tërhoqi akuzat per pastrim parash dhe gjykata e pushoi çështjen ndaj Lulzim Bashës, Ilir Dervishajt dhe Arben Ristanit.
Mediat ndërkombëtare nënvizojnë se ish-kryetari i Partisë Demokratike, Lulzim Basha ka dhënë shpjegime të ndryshme për pagesën 500 mijë dollarëshe, duke u shprehur në fillim se ajo u dha nga shqiptaro-amerikanët, por më pas është shprehur se “Çfarë ka bërë lobuesi dhe si e ka bërë lobuesi e di ai dhe se ato jane marrëdhënie të firmës Muzin me palë të treta”./tvklan