Guvernatori i Bankës së Shqipërisë, Gent Sejko tha se goditja ekonomike nga lufta në Ukrainë, që po rrit çmimet dhe po ul aktivitetin ekonomik, do të transmetohet edhe në ekonominë shqiptare.
Më herët ekonomisti i BQE-së, Fabio Panetta, pranoi se në vendet e Europës po ndodh e njëjta gjë që ka përshkruar Guvernatori Sejko, dhe e quan atë stanjacion (inflacioni rritet dhe ekonomia bie).
Sejko, në raportimin e tij në Komisionin e Ekonomisë, bëri thirrje që në fokus të mbështetjes nga politikat fiskale të jenë shtresat në nevojë dhe më të brishta. Dhe kjo gjë duhet të financohet nga të ardhurat shtesë të siguruara nga rritja e çmimeve dhe nga rishikimi i shpenzimeve joprioritare. Në këtë mënyrë, efektiviteti i ndërhyrjes nuk do të dëmtojë treguesit e borxhit publik.
Gjatë fjalës, Guvernatori përmendi të gjitha problemet e krijuara në Shqipëri nga lufta në Ukrainë, që nga rritja galoponte e çmimeve të produkteve, shtrenjtimi i kostos së jetesës dhe biznesit, por edhe problemet në furnizim.
Por, nga ana tjetër, Sejko tha se zhvillimi ekonomik do të vazhdojë të mbetet i pacënuar dhe se rritja do të vijojë në 2022-shin e në vijim.
Inflacioni do të mbetet në nivele relativisht të larta gjatë vitit 2022, ndërsa pritet të vijë në rënie gjatë vitit 2023.
Këto projeksione mbështeten në tre konsiderata të rëndësishme, sipas Sejkos.
“Së pari, ato supozojnë mospërshkallëzimin e konfliktit dhe vijimin e rritjes në partnerët tanë tregtarë. Së dyti, ato faktorizojnë bazat solide në të cilat ndodhet ekonomia shqiptare pas rimëkëmbjes së gjithanshme të vitit 2021.
Në mënyrë të përmbledhur, më lejoni të theksoj se ekonomia shqiptare e mbylli vitin 2021 me parametra të përmirësuar ekonomikë e financiarë. Vëllimi i aktivitetit ekonomik u rrit, punësimi u zgjerua dhe rritja e pagave u përshpejtua. Në tërësi, bilancet e sektorit privat u përmirësuan dhe tregjet financiare funksionuan normalisht.
Në veçanti, sektori bankar ruajti tregues të mirë likuiditeti, kapitalizimi dhe rentabiliteti. Së treti, ato kërkojnë rishikimin e vazhdueshëm të miksit të politikave ekonomike. Në gjykimin e Bankës së Shqipërisë, këto politika duhet të vijojnë të ofrojnë mbështetje për procesin e rimëkëmbjes, por pa paragjykuar për asnjë moment stabilitetin monetar e financiar të vendit,” -tha Sejko.
