Grupi muzikor “Riblja Çorba” performoi mbrëmjen e djeshme në qytetin e Leposaviqit. Ky organizim u mundësua nga Ministria e Kulturës në Beograd.
Ardhja e këtij grupi nuk është mirëpritur nga artistët vendas. Agim Berisha dhe Agim Gërguri kërkuan nga institucionet kosovare që të parandalonin këtë aktivitet.
Grupi njihet për qëndrimet kundër shqiptarëve. Madje, në disa prej këngëve të tyre ‘tallet’ shteti i Kosovës dhe politikanët kosovarë. Themeluesi dhe vokalisti kryesor i bendit, Bora Gjorgjeviç, në vitin 2013 e kishte quajtur Kosovën “shtet i trilluar”.
“Zgjedhjet që po mbahen atje në thelb e legalizojnë shtetin e Kosovës. Ai shtet nuk ekziston, ai shtet është i trilluar. Nuk përzihem në punët e atjeshme sepse unë nuk jetoj në Kosovë. Qëndrimi i partisë sime është i drejtë nuk duhet të dilet në këto zgjedhje sepse kështu legalizohet shteti i shqiptarëve”, ishte shprehur ai.
Muzika e këngëtarëve serbë në territoret shqiptare është bërë këto kohë shkak i debateve të forta në rrjetet sociale. Kundërshtim të madh ka patur edhe për performancën që do të mbajë këngëtari serbo-boshnjak Goran Bregoviç në Korçë. Disa nga këngëtarët shqiptarë, si Capital T, Dafina Zeqiri e Shemi nga grupi “Ilirët”, të cilët ishin të ftuar për të performuar në këtë festival, kanë anuluar pjesëmarrjen e tyre.
