Arkivi Qendror Shtetëror i Filmit uroi të hënën aktorin Reshat Arbana, Nderi i Kombit, për 85-vjetorin e lindjes.
“Në këtë përvjetor, e urojmë me dashuri e mirënjohje, si një aktor që nuk luajti vetëm role, por preku jetët tona me artin e tij të sinqertë”, u shpreh në një postim në rrjetet sociale, drejtori i AQSHF, Eljan Tanini.
Ai kujtoi se, me këtë rast, Arkivi Qendror Shtetëror i Filmit do të shfaqë sot në kinemanë e institucionit, dokumentarin “Përballë, me Reshat Arbanën”.
Reshat Arbana është një prej figurave më të dashura nga publiku, për kontributin e tij të dhënë në kinematografi dhe teatrin shqiptar. Ai solli në jetë mbi 40 personazhe në kinematografi dhe qindra role në teatër, duke u bërë një simbol i gjallë i shpirtit popullor, burrërisë, dhimbjes, revoltës dhe dashurisë për vendin.
Disa nga rolet e tij më të spikatura janë Islami tek “Duel i heshtur” (Anagnosti, 1967), Samiu tek “Fije që priten” (1976), Prefekti tek “Gjeneral gramafoni” (Gjika, 1978), Bimbashi tek “Liri a vdekje” (Muçaj, Mitro, 1979), Isa Boletini tek “Nëntori i dytë” (Gjika, 1982), Ahmeti tek “Dora e ngrohtë” (Çashku, 1983), Adnani tek “Hije që mbeten pas” (Musliu, 1985), Aliu tek “Binarët” (Fejzo, 1987), Emili tek “Rikonstruksioni” (Kasaj, 1988), Kukë Memini tek “Balada e Kurbinit” (Çashku, 1990).
Për rolet e Dajlan Beut tek “Kush vdes në këmbë” (Prifti, 1984) dhe Kryetarit të Këshillit tek “Kur hapen dyert e jetës” (Ljarja, 1986), ka fituar Medalionin e Festivaleve të Filmit në vitet 1985 dhe 1987.
