Porti i Durrësit ka kaluar tërësisht në pronësi të kompanisë Durrës Yacht&Marina. Në datën 21 korrik, Këshilli i Ministrave ka vendosur që të transferojë në emër të kompanisë që do të ndërtojë portin turistik në këtë qytet të gjithë strukturën dhe infrastrukturën e Portit. Vendimi i jep investitorit 5.4 hektarë ndërtesa të portit, duke i hapur rrugë nisjes së konstruksionit të marinës turistike. Në dhjetor të vitit të shkuar qeveria kaloi të 80 hektarë truall në pronësi të kompanisë “Symphony Real Estate Development”, firmë e regjistruar në ishujt Kajman, me kapital të deklaruar në Emiratet e Bashkuara Arabe.
Plani i qeverisë është që porti i mallrave të qytetit të transferohet në zonën e Porto Romanos, ndërtim i cili pritet të nisë pas përfundimit të projektit për strukturën e portit të ri. Projekti për marinën turistike të Durrësit do të kapë një vlerë investimi 2 miliardë dollarë dhe do të përfshijë ndërtimin e marinës turistike, ambienteve të banimit dhe do të mbajë terminalin e udhëtimeve të pasagjerëve. Në dhjetor të vitit të shkuar Komiteti i Investimeve Strategjike i dha kompanisë statusin e investitorit strategjik, vendim i cili lejon dhurimin e tokës shtet në mbështetje të projektit.
Projekti arab për portin e Durrësit
Berisha dhe Meta kundër
Brenda një muaji pritet që të fillojë shitja e apartamenteve që do të ndërtohen në kuadër të Projekti Durrës Yacht & Marina, për të cilin është deklaruar se do të ketë një vlerë totale investimi prej 2 miliardë euro. Kështu shkruan revista ekonomike Monitor. Sipas saj, punonjës të kompanisë zhvilluese po kontaktojnë me klientët potencialë dhe i kanë njoftuar se së shpejti do të bëhet prezantimi i projektit dhe do të fillojë shitja e apartamenteve, çmimi i të cilave do të bëhet publik ditën e prezantimit. Projekti Durrës Yacht & Marina ka marrë statusin strategjik, pas të cilit shteti shqiptar u bë bashkë-aksioner, pasi në dispozicion të projektit u vunë 80 hektarë tokë shtetërore.
Fillimisht u deklarua se projekti do të ndërtohej nga kompania e njohur e Emirateve Arabe, Dubai, por më pas në Qendrën Kombëtare të Biznesit është regjistruar si zhvilluese shoqëria offshore Symphony Real Estate Development. Paralelisht me këtë projekt, parashikohet të kryhet dhe zhvendosja e Portit të Durrësit në Porto Romano, një proces që pritet të zgjasë me vite.
Por teksa projekti është i mbuluar me mister, opozita e quan një mega-skandal. Dje, Berisha paralajmëroi qytetarët që të mos blejnë apartamente te ky projekt, pasi do jenë subjekt konfiskimi.
“E morët vesh që në Portin e Durrësit kanë filluar të shesin apartamente? Edhe atë po e ndjekim. U bëj thirrje qytetarëve që të mos bien viktimë e një piramide mashtrimi që po ndërtohet në port, se çdo gjë do jetë subjekt konfiskimi. Ajo është një nga aferat më të mëdha korruptive. Ftoj qytetarët e Durërsit që të mos vendosni asnjë investim në një skemë gjigante vjedhje që shkon deri në 4-5 miliardë euro,” tha Berisha.
Edhe kryetari i Partisë së Lirisë, Ilir Meta u ka bërë thirrje qytetarëve që të mos blejnë apartamente në projektin e Portit të ri të Durrësit dhe të mos bien pre e mashtrimit, të asaj që ai e cilëson një skemë të pastër piramidale. Përmes një postimi në rrjetet sociale, Meta shprehet se për projektin e ri ka mungesë të plotë transparence dhe nuk është publikuar kontratë apo informacion se si do të bëhet ndarja e të ardhurave. Sipas tij, kjo është vetëm një aferë e pastër korruptive, që synon të grabisë paratë e shqiptarëve. Meta u bën thirrje gjithashtu organeve të drejtësisë të reagojnë menjëherë dhe të ndërhyjnë për të penguar nënshkrimin e çdo kontrate paraprake shit-blerje, që është në kundërshtim të ligjit dhe në dëm të qytetarëve.
