Përkujtimi i 2 prillit, masakrës së Shkodrës, bëri bashkë sot krejt demokratët. Në Shkodër, gjatë homazheve pranë memorialit pëkatës, ishte lideri historik i demokratëve, Sali Berisha, bashkë me gjithë deputetët demokratë të kryeqendës së veriut.
Po ashtu nuk mungonte as kryetari në detyrë i PD së qytetit, Xhvdet Amuli. Një shenjë bashkimi rreth idealave të atyre që sakrifikuan edhe jetën për të sjellë demokracinë në vendin tonë dhe larguar diktaturën hoxhiste të gati gjysmë shekulli.
Merrte pjesë edhe Bardh Spahia, kryebashkiaku i ri i Shkodrës, familjarët e heronjve të demokracisë, të persekutuar politikë etj. Kjo datë është sa e dhimshme, aq edhe heroike, sepse nderohen katër djemtë martirë shkodranë. Ata u vranë pabesisht nga “bisha e kuqe” 31 vite më parë, në demonstratën anti-komuniste dhe u bënë dëshmorët e demokracisë.
Kujtojmë se protestat kundër regjimit diktatorial të komunistëve enveristë më 2 prill 1991 iu morën jetën katër të rinjve studentë në qendër të Shkodrës. Shpallja e protestave në të gjithë Shqipërinë arriti pikën kulmore në kryeqendrën e veriut, nga ku u demonstrua hapur qëndresa e studentëve dhe popullsisë vendase për te rrëzuar regjimin.
Vrasja e të rinjve futi në zi jo vetëm Shkodrën, por të gjithë Shqipërinë, pasi u morën katër jetë të pafajshme, katër jetë rinore; Arben Broci, Bujar Bishanaku, Nazmi Kryeziu dhe Besnik Ceka, të cilët u bënë martirë të demokracisë.
