Ambasadorja amerikane ka zhvilluar së fundmi një takim me ish-ambasadorët amerikanë në Shqipëri ndër vite.
Kim ka postuar foton në rrjetet sociale, ku shihet krahë ambasadorëve Bill Ryerson, Marisa Lino, Jim Jeffrey, Marcie Ries dhe Alex Arvizu.
Në mesazhin e saj, Kim thekson se ajo dhe kolegët e saj kanë pasur eksperienca të ndryshme në 31 vite që prej rënies së komunizmit në Shqipëri, por kanë disa gjëra të përbashkëta.
“Një mbledhje e mrekullueshme në Uashington me ish-ambasadorët e Shqipërisë, Bill Ryerson, Marisa Lino, Jim Jeffrey, Marcie Ries, Alex Arvizu. Të gjithë kemi pasur eksperienca të ndryshme në 31 vite qëkur shqiptarët u liruan nga zinxhirët e diktaturës komuniste, por ne kemi një gjë të përbashkët: besimin se lidhja mes shqiptarëve dhe amerikanëve është në të vërtetë speciale, admirimin për arritjet e mëdha të shqiptarëve pavarësisht nga rrethanat, dhe optimizmin e qëndrueshëm për të ardhmen”, shkruan Kim.
Yuri Kim është sulmuar shpesh nga ish kryeminsitri Sali Berisha, pas shpalljes së tij ‘non grata’ nga SHBA-ja. Teksa e quan guvernatore, Berisha thotë se Kim po del nga roli i saj diplomatik, duke ndërhyrë në punët e brendshme të vendit.
Së fundi ka qarkulluar online edhe një peticion, që kërkon ndalimin e Yuri Kim për të ndërhyrë në çështjet e brendshme politike. Pavarësisht se askush nuk ka marrë autorësinë nga opozita, ai vjen në një moment që Kim ka bërë të qartë se SHBA do të shkëpusë marrëdhëniet me Berishën dhe ka njohur Alibeajn si përfaqësues të PD-së.
