Duke nisur nga dita e sotme të gjitha makinat me targa serbe që futen në Kosovë do të detyrohen të të pajisen me targa të përkohshme të Republikës së Kosovës.
Bashkimi Evropian i bëri thirrje Prishtinës dhe Beogradit që të ndërmarrin masa për t’i ulur tensionet në veri të Kosovës, pasi Kosova nisi të zbatojë masa reciprociteti me makinat me targa serbe.
“Jemi duke vëzhguar situatën nga afër dhe dua të theksoj liria e lëvizjes është një kusht themelor i BE-së dhe këtë e presim edhe nga Kosova dhe Serbia që ta promovojnë atë. Ne u bëjmë thirrje të dyja palëve që të përmbahen dhe të reduktojnë tensionet. Menjëherë dhe pa ndonjë vonesë”, ka deklaruar Stano.
Stano ka deklaruar se Kosova dhe Serbia duhet të përdorin dialogun si platformën e vetme për të zgjidhur të gjitha çështjet e hapura që mund t’i kenë këto dy vende, përfshirë edhe lirinë e lëvizjes.
Kryeministri i Kosovës Kurti ka theksuar se një masë e tillë nuk synon destabilizimin ose të provokojë, por ka mbrojtur vendimin e qeverisë së tij duke thënë se 15 shtatori i vitit 2021 ishte afati i fundit kur përfundimisht do të duhej të mbyllej marrëveshja e arritur në Bruksel mes Kosovës dhe Serbisë dhe të ndalohej qarkullimi i veturave me çfarëdo nga tabelat, përveç atyre RKS.
“Veprimet e ndërmarra sot nga organet kompetente për zaptimin e kësaj marrëveshjeje për lëvizje të lirë nuk janë të drejtuara kundër qytetarëve serbë. Ato në asnjë mënyrë nuk kanë qëllim t’i cenojnë lëvizjen qytetarëve serbë apo të provokojnë çfarëdo destabilizimi. Sikurse dje, sot, por edhe nesër qytetarët serbë do të lëvizin lirshëm të sigurt dhe të mbrojtur nga ligji. Pres nga të gjithë qytetarët që sot nuk po ndodh asgjë e jashtëligjshme, sot po fillon zbatimi i një marrëveshje për të cilën është pajtuar edhe Serbia me ndihmën e BE-së” , tha Kurti.
Vendosja e reciprocitetit me Serbinë, për targat ka bërë që ditën e sotme presidenti i Serbisë, Aleksandër Vuçiç të thërrasë një mbledhje urgjente të Këshillit të Sigurisë Kombëtare të martën në orën 10 të mëngjesit.
Në bazë të vendimit të Qeverisë së Kosovës, të gjitha automjetet me targa të Serbisë që hyjnë në Kosovë të pajisen me targa të përkohshme, të cilat duhet të vendosen në vende të dukshme dhe për pajisjen me këto targa duhet paguar taksa prej 5 eurove, të vlefshme për 60 dite.
