Në Berat u prezantua dje libri “Historia dhe arkitektura e banesës Lluci Velagoshti”, me autor Dritan Çokun, shkruan atsh
Botimi është rezultat i një pune kërkimore individuale dhe dyvjeçare të autorit, i cili i kushton vëmendje të veçantë një banese karakteristike me çardak të shekullit XVIII. Banesa ka qenë një objekt me vlera të spikatura për trashëgiminë kulturore shqiptare, por fatkeqësisht, nuk ekziston më fizikisht që prej vitit 1969.
Në aktivitetin e organizuar nga Drejtoria Rajonale e Trashëgimisë Kulturore Berat dhe Biblioteka e qytetit, morën pjesë përfaqësues të institucioneve vendore, studiues dhe personalitete të fushës së trashëgimisë kulturore, të cilët vlerësuan rëndësinë e këtij botimi për qytetin e Beratit.
Prezantimi i librit u shoqërua edhe me një ekspozitë personale, e përbërë nga 12 panele me 24 skica bardhë e zi të grafikës artistike. Këto vizatime përfaqësojnë pamje të objekteve të ndryshme arkitektonike, pjesë e ansambleve urbane me vlera historiko-kulturore, që sot nuk ekzistojnë më në qytetin e Beratit. Skicat janë gjithashtu pjesë e ilustrimeve të librit dhe pasqyrojnë përkushtimin e autorit për të rikthyer nga ana pamore trashëgiminë e humbur dhe për të reflektuar mbi trashëgiminë kulturore shqiptare, historinë, identitetin kombëtar dhe kujtesën kolektive.
