Komisioni i punimeve të Kuvendit, i drejtuar nga deputeti Belind Këlliçi ka vendosur që institucioni i Partisë Demokratike të mblidhet sërish më 22 mars të vitit që vjen për të zgjedhur kryetarin e ri të demokratëve, e po ashtu edhe drejtuesit e funksioneve të tjera.
Shkarkohet kryetari i Partisë Demokratike, Lulzim Basha! Kuvendi Kombëtar i Partisë Demokratike, i thirrur nga ish-kryeministri Sali Berisha ka vendosur për largimin nga detyra të sekretarëve, 4 nënkryetarëve të PD-së dhe vetë Bashës nga postet që mbajnë. Gjithashtu u vendos që Azem Hajdari të ishte “President Nderi i PD”, ashtu siç edhe ishte premtuar nga Berisha gjatë aksionit të “Foltoreve”.
Komisioni i punimeve të Kuvendit, i drejtuar nga deputeti Belind Këlliçi ka vendosur që institucioni i Partisë Demokratike të mblidhet sërish më 22 mars të vitit që vjen për të zgjedhur kryetarin e ri të demokratëve, e po ashtu edhe drejtuesit e funksioneve të tjera. Po ashtu në Kuvendin e sotëm janë miratuar edhe ndryshimet në Statut, ku janë shtuar edhe primaret. Ndër ndryshimet parashikohet votëbesimi i kreut të PD-së në rast të rezultati të keq në zgjedhje lokale; ndërkohë në zgjedhjet parlamentare, kryetari që humb zgjedhjen duhet të japë dorëheqjen e parevokueshme.
Të gjitha propozimet janë votuar me duar nga thuajse 5 mijë delegatët e mbledhur në stadiumin “Air Albania”, të gjithë nën moton: Për një Parti Demokratike, më të hapur, më të fortë dhe më të bashkuar! Ndërkohë që punimet e Komisionit do të vazhdojnë, në Kuvend për rreth 5 orë do të mbahen edhe fjalime para demokratëve.
Por paralelisht me Kuvendin, kreu aktual i Partisë Demokratike, Lulzim Basha po zhvillon një festë brenda selisë blu, e gjitha me rastiun e 31-vjetorit të themelimit të partisë. Pikërisht në oborrin e PD-së ka vendosur një memorial, ku janë gdhendur firmat e të gjithë themeluesëve të PD-së, mes tyre dhe Berisha. Ndërsa Basha mbajti edhe një fjalim të shkurtër, duke sulmuar ashpër liderin historik Sali Berisha, të cilin e krahasoi me diktatorin Enver Hoxha, duke kërkuar nga demokratët që të mos mbështesin kultin e individit. Po ashtu, numri një i opozitës, tha se dera vazhdonte të ishte e hapur për të gjithë demokratët e zhgënjyer, duke vënë theksin tek fakti se PD ishte e krah Amerikës dhe vlerave europiane!
Por ç’ka ndodhur brenda Partisë Demokratike? Pse jemi në këtë pikë?
Historia fillon në 9 shtator kur Lulzim Basha pezulloi Sali Berishën, tashmë “non grata” nga Amerika nga grupi parlamentar. Pas vendimit të Bashës, Berisha iu rikthye aktivitetit të tij politik, duke nisur takimet me bazën që i quajti “Foltore”. Deri në 10 nëntor pretendonin se kishin mbledhur 4200 firma delegatësh për të mbledhur Kuvendin e jashtëzakoshëm kundër Bashës në 11 dhjetor. Kryetari i PD iu përgjigj me një datë tjetër për mbledhjen e Kuvendit në 18 tetor.