Ministrja e Drejtësisë, Etilda Gjonaj, ka reaguar në lidhje me skandalin e kryetares në detyrë të Gjykatës së Elbasanit, Enkeleda Kapedani. Lidhur me videot e publikuara në media ku ajo shihej teksa dëgjonte muzikë dhe bënte “sfilatë” në ambientet e brendshme të Gjykatës së Elbasanit, Gjonaj ka një sërë kritikash.
Ministrja ka kërkuar që të merret masa e duhur, e kësisoj edhe të hetohet në mënyrë të thelluar gjendja pasurore e kësaj gjyqtareje. Etilda Gjonaj e mbyll mesazhin duke nënvizuar se reforma në drejtësi nuk do ndalet.
“Të pakomentueshme shfaqjet e gjyqtares së Elbasanit, dhe për të ardhur keq që qysh prej dhjetorit 2019, i kam kërkuar me shkrim KLGJ-së verifikimin dhe marrje mase për të pas lirimit të një subjekti kriminal. Tani uroj që jo vetëm të merret masa e duhur, por edhe të hetohet në mënyrë të thelluar gjendja pasurore e kësaj gjyqtareje.
Tipike për një pjesë të atyre që nuk kanë kaluar ende Vettingun dhe vijojnë të gërryejnë drejtësinë nga brenda! Reforma nuk do ndalet, dhe kush e ka turpëruar drejtësinë do të përballet me të deri në fund”, shkruan Gjonaj.
Më herët, Kapedani tha se këto video sipas saj, janë publikuar për të prishur imazhin.
