Inspektoriati Kombëtar i Mbrojtjes së Territorit ndërhyri sot për të prishur një objekt pa leje në bregdet, pjesë e “Prestige Resort” që është në pronësi të Fokus Grup, një grup mediatik që zotëron edhe televizionin News 24, BalkanWeb dhe gazetën Panorama.
Mediat në fjalë e quajtën këtë aksion të paligjshëm dhe akuzuan qeverinë për presion ndaj tyre.
Por Ministria e Brendshme ka sqaruar se ndërhyrja është pjese e operacionit “Bregdeti Ynë”, i cili është ndërprerë gjatë muajit Qershor, për të rinisur në Shtator.
Ministria thotë se rikthimi i rreth 4 mijë metrave katrorë rërë e det të kthyera në beton është trajtuar nga mediat e zotit Irfan Hysenbelliu si sulm ndaj linjës editoriale të tyre.
Por sipas Ministrisë së Brendshme, ky është një shantazh mediatik. Sipas drejtuesve të “Focus Grup”, urdhri është i paligjshëm dhe paligjshmëria është bërë shkak që ish-drejtori i Inspektoriatit, Ajet Zyberi ka dhënë dorëheqjen pikërisht se ka refuzuar zbatimin e tij.
Por Ministria thotë se kjo është krejtësisht e pavërtetë, pasi Zyberi do të drejtojë operacionin e ri kombëtar të Task Forcës kundër lidhjeve të paligjshme të energjisë elektrike, i cili do të nisë javën e ardhshme.
Ministria publikoi edhe një dokument për të hedhur poshtë pretendimet e grupit mediatik se ndërtimi ka qenë me leje.
