Gazeta Panorama ka siguruar detaje nga dosja hetimore e Prokurorisë së Elbasanit lidhur me tre të dyshuarit për spiunazh në Shqipëri, dy shtetas rusë dhe një ukrainas, pas incidetit të ndodhur të shtunën në uzinën e demontimit të armëve në Gramsh.
Panorama mëson se nga marrja në pyetje e tyre deri në këtë fazë të hetimit, organi i akuzës ka baza të arsyeshme të të dhënave që krijon dyshimin e bazuar në prova se ata “kanë ardhur në Shqipëri me mision të rekrutuar nga shërbimet e intelegjencës ruse me detyra të përcaktuara”.
Ndërkohë që prokurori i çështjes ka urdhëruar ruajtjen e sekretit të akteve të hetimeve paraprake që i përkasin deklarimeve të këtyre shtetasve të huaj.
Në dosje thuhet se arrestimi i këtyre shtetasve, u bë pasi më datë 20.08.2022, rreth orës 17:30, këta shtetas janë konstatuar brenda ambjeteve të objektit ushtarak “Uzina e Mekanike Çekin Gramsh (Ish Uzina e Armève) duke kryer filmime dhe fotografime të fshehta, nëpërmjet pajisjeve speciale elektronike të fotografimit.
Nga kqyrjet paraprake të pajisjeve elektronike kanë rezultuar të dhëna me rëndësi për hetimit që lidhen me fotografi të objekteve të ndryshme ushtarake dhe objekteve të infrastrukturës kritike civile në gjendjen aktuale”.
