Biznesmeni italian Francesko Beketi ka folur për herë të parë për gjyqin që ka fituar kundër Shqipërisë.
Në një intervistë për televizionin pranë opozitës “Syri”, Beketi tha se në një total bashkë me shpenzimet e gjyqit, qeveria do duhet të paguajë rreth 150 milionë euro.
I pyetur në lidhje me deklaratat e kryeministrit Rama, i cili ka thënë se nuk do t’i marrë kurrë paratë, Beketi tha se këto janë deklarata politike dhe se Shqipëria është e bllokuar dhe nuk mund të marrë kredi nga bankat në botë, nëse nuk e dëmshpërblen atë fillimisht me paratë që i detyrohet.
“Vendimi është përfundimtar dhe flet në mënyrë të qartë. Kanë vendosur në unanimitet që qeveria ndërmori një fushatë politike kundër meje, që e ka realizuar ndëmjet shpërdorimit të kopetencave të policisë.
Qeveria shqiptare duhet të na paguajë rreth 120 milion euro. Duhet të paguajë edhe 30 milion euro për shoqërinë fuqi, pra në total 150 milion euro.
Qeveria shqiptare duhet t’i bindet vendimit që është definitiv, i formës së prerë. Qeveria shqiptare e ka konfirmuar shprehimisht angazhimin për të paguar nëse merrej vendimi. Avokatët amerikanë të Shqipërisë dhe ata nga ana e avokaturës së shtetit e kanë nënshkruar këtë gjë.
Nëse nuk zbatohet vendimi Shqipëria do të bllokohet. Banka Botërore, BERZH do të bllokojnë mundësitë e Shqipërisë për marrje të kredive nëse nuk paguan dëmshpërblimin që duhet të pagujë. Kam qenë gjithmonë i gatshëm nga ana ime për ta zgjidhur këtë çështje, por qeverisë shqiptare s’i ka interesuar kurrë,”– tha Beketi.
