Presidenti serb, Aleksandar Vuçiç ka premtuar fuqizimin e ushtrisë duke kujtuar problemet qe vendi ka, sipas tij, me Kosovën. Vuçiç tha se do të ketë investime të mëtejshme në ushtri dhe sistemin e mbrojtjes, si dhe rritje të konsiderueshme të të ardhurave për anëtarët e saj gjatë këtij viti.
“Ju e dini se çfarë problemesh kemi në Kosovë, ne gjithashtu kemi probleme të tjera rajonale, së bashku me problemet e llojit të tretë, të cilat kanë të bëjnë me mosmarrëveshjet gjeopolitike të fuqive të mëdha ku ne shpesh jemi vendi rreth të cilit interesat e tyre përplasen,” – ishte komenti i kreut të shtetit serb që shoqërohej nga ministri i Mbrojtjes, Nebojsha Stefanoviç dhe shefi i Shtabit të Përgjithshëm.
I menjëhershëm ka qenë reagimi i Kryeministrit në detyrë të Kosovës, Avdullah Hoti, i cili tha se deklarata te tilla nuk i shërbejnë paqes dhe stabilitetit ne rajon.
“Kosova mbetet e përkushtuar në rrugën e saj drejt integrimit në NATO dhe thellimit të bashkëpunimit me partnerët strategjik ndërkombëtarë, SHBA-të dhe vendet mike të BE-së. Deklarata e Presidentit të Serbisë Vuçiç, për ngritjen e kapaciteteve ushtarake, me pretekst zhvillimet në Kosovë, nuk i shërben paqes dhe stabilitetit në rajon, e aq më pak arritjes së marrëveshjes përfundimtare dhe njohjes reciproke,” – thekson Hoti në reagimin e tij.
Nuk është hera e parë që Vuçiç flet për konflikt me Kosovën. Në fund të vitit të shkuar ai e krahasoi ngërçin e Kosovës me atë të Nagorno Karabakut, e duke iu referuar luftimeve mes Azerbajxhanit dhe Armenisë, u përpoq të tregonte sesi edhe “nga një konflikt i ngrirë prej 30 vjetësh mund të shpërthejë lufta.
