Kryeministri Edi Rama ka reaguar në rrjetet sociale, në lidhje me protestën që është paralajmëruar të mbahet nesër në Vlorë, kundër projektit të Rilindjes Urbane në sheshin e Flamurit.
Sipas Ramës, projekti nuk parashikon asnjë stacion autobusi që pretendohet nga qytetarët, ndërsa thotë se mezor pret përfundimin e kësaj vepre të Rilindjes Urbane.
Postimi i Ramës
Më thonë qenkan revoltuar foltorexhinjtë e Vlorës se dashkan transparencë për projektin e Sheshit të Flamurit! U duket kolonata si stacion autobuzësh e duan shembjen e hotelit të tyre fantazëm, që arkitekti i famshëm belg e kthen në qendrën më të madhe social-kulturore të vendit!
Nuk u ve faj se as nuk dinë as nuk bëjnë dot gjë tjetër përveç përshesheve me baltë, po Sheshi i Flamurit do të jetë një tjetër spektakël urban në Vlorën e Rilindur, që mezi pres ta shoh të realizuar megjithë qendrën social-kulturore, e cila do t’i japë Vlorës një përmasë të re!
Paralajmërimi i qytetarëve për protestën:
Të dielën ora 11:00 do të ketë një protestë në “ Sheshin e Flamurit në Vlorë” e cila do të kërkoi transparencë për projektin më të turpshëm të Vlorës. Projekt i cili nuk shemb pallatin 15 katësh dhe njëkohësisht ndërton një stacion autobusi në funksion të tij.
