Ndaj biznesmenit Andon Dhima, ka mbetur në tentativë një atentat tipik mafioz, mbrëmjen e së enjtes në kryeqytet.
Dhima ka denoncuar në polici faktin se ka një konflikt me një person, dhe për këtë ka vënë në dijeni vetë kryeministrin, presidentin dhe ambasadën e SHBA.
Gazetari Artan Hoxha ka publikuar një video ku shihet si vijnë nga pas atentatorët që duan ta ekzekutojnë, por biznesmeni ishte futur në ashensor. Ai tha se deri më tani ka dhënë deklarim vetë biznesmeni, djali dhe vajza e tij e cila ka qenë prezente në momentin kur dy persona kanë tentuar të ekzekutojnë të atin.
“Bëhet fjalë për një atentat të dështuar që ka ndodhur mbrëmjen e enjte. Atentati ka ndodhur ditën e enjte diku në mbrëmje. Për fat të mirë ka dështuar por do kishim një biznesmen të vrarë në mes të kryeqytetit. Bëhet fjalë për një ngjarje e cila ka krijuar një problematikë së pari për fat të mirë që nuk u realizua objektivi. Biznesmenin e ka shpëtuar fati.
Është një ngjarje që është mbajtur në heshtje. Është dukur në fillim si e pabesueshme. Realisht ngjarja tashmë është në hetim. Ka dhënë deklarim biznesmeni, djali dhe vajza e tij që ka qenë prezente aty.
Po merret në pyetje roja i pallatit. Duhet të parandalohet që kjo ngjarje të ketë vijim dhe pasoja. Kemi të bëjmë me një biznesmen që para se të ndodhte kjo i është drejtuar prokurorisë, letër kryeministrit dhe presidentit dhe ambasadës së SHBA me dosje. Personi e ka thënë me bindje se ka konflikt vetëm me një person. Ngjarja duhet hetuar për shkak të rrezikshmërisë së madhe. Mund të ishte vrarë ai dhe vajza e tij”, tha Artan Hoxha.
Është raportuar më pare se biznesmeni ka pasur përplasje të forta me drejtorin e Top Channel, Ben Blushi, i cili dje është thirrur në polici, për t’u marrë në pyetje në lidhje me rrethanat e kësaj ngjarje.
