Lezha ka zgjedhur që muajin e letërsisë t’ia kushtojë poetit kombëtar At Gjergj Fishta, në kuadër të përvjetorit të lindjes së tij.
Ndërsa aktivitetet kanë sjellë vëmendje të re për figurën e tij, shkrimtarë dhe botues lezhjanë theksojnë se nderimi i vërtetë duhet të vijë përmes leximit të veprës dhe jo vetëm përmes ceremonive përkujtimore.
“Nuk mund të flasësh për Fishtën pa e lexuar atë. Fishta është një poet me dimension kombëtar dhe evropian”, u shpreh Hekuran Koka, Kryetar i Klubit “Ndoc Gjetja”.
Botuesi Frano Kulli, që ka sjellë për publikun kolanën e plotë të veprës së Fishtës, thekson se është mirë që flitet për të, por më e rëndësishme është që vepra të lexohet dhe të studiohet.
Sipas tij, edhe objektet e ndërtuara për ta nderuar Fishtën qëndrojnë të mbyllura, ndonëse duhej të ishin qendra te pelegrinazhit kulturor.
“Ajo që duhet të theksohet në mënyrë të veçantë është se sa e përcjellim ne Fishtën, tek brezi i ri, tek shkollat”, tha botuesi, Frano Kulli.
Krijuesit dhe botuesit theksojnë se At Gjergj Fishta nuk duhet të mbetet thjesht një figurë simbolike, por një autor që lexohet, debatohet dhe përcillet tek brezat e rinj si themelues i mendimit letrar dhe kombëtar shqiptar.
Gazetar: M. Marashi
