Sipas një raporti të publikuar së fundmi nga Eurostat vetëm gjatë vitit 2020 janë larguar nga Shqipëria drejt vendeve të BE, 12 mijë e 200 fëmijë nën moshën 15 vjeç.
Dokumenti që shfaq shifra të frikshme, i referohet të miturve që kanë marrë leje qëndrimi, ndërsa destinacionet kryesore janë Gjermania, Greqia dhe Italia.
Për sociologen Entela Binjaku, ky dokument nxjerr në pah një fenomen shqetësues. Sipas saj, janë kryesisht prindërit ata që bëhen shkak i largimit të fëmijëve për shkak se nuk shohin perspektivë për të rinjtë në Shqipëri.
“Arsyet lidhen në radhë të parë me perspektivën që prindërit e të miturve shohin jashtë Shqipërisë dhe pasiguria që prindërit e këtyre të miturve ndjejnë për të ardhmen e tyre në vendin tonë”. Ajo kërkon gjithashtu që pridnërit të tregohen të përgjegjshëm dhe të kujdesshëm.
Të shohin kosto shpirtërore ekonomike që ka largimi i fëmijëve dhe ata mund të bëhen viktima të rrjeteve të trafikut.
Sipas Binjakut, Shqipëria po humbet shumë nga largimet masive. “Eshte një ndër dramat më të mëdha që po i ndodh vendit”
Shqipëria renditet e dyta pas Ukrainës në Europë për dhënien e lejes së qëndrimit për fëmijët nën 15 vjeç, në një nga shtetet e Bashkimit Europian. Nga 64 mijë leje qëndrimi që janë dhënë në BE, 19% e tyre, ose rreth 12.2 mijë ishin për shtetas shqiptarë.
