Pak ditë pas përfundimit të “Eurovision”-it, Gjon’s Tears ka mbërritur në Tiranë. Gjon Muharremaj, i njohur me emrin e artit Gjon’s Tears, fitoi vendin e tretë në “Eurovision”, ku përfaqësonte Zvicrën. Këngëtari me origjinë shqiptare, në një intervistë për “Top Channel” ka rrëfyer se tashmë karriera e tij do të vazhdojë në Paris dhe se do të përgatisë disa albume të reja.
“Njerëzit janë të interesuar për muzikën time. Me “Eurovision”-in kam pasur mundësinë që t’i prek njerëzit muzikalisht. “Eurovision”-i më ka hapur shumë dyer. Do shkoj në Francë dhe më pas në Spanjë për muzikë. Ishte shumë bukur të merrja pjesë në “Eurovision”, tha Gjoni.
Ai pohoi se nuk e ka mohuar kurrë origjinën e tij. “Nuk e kam fshehur kurrë që jam shqiptar dhe jetoj sikur jam në tre vende, Shqipëri, Kosovë dhe Zvicër. Ajo që më ka dhënë mua famë ka qenë “Albanians Got Talent” dhe “The Voice Kids” kur këndova këngën time ‘Babi’. Dua tu them të gjithë atyre që kanë plane në muzikë, që të punojnë sa më shumë, të kenë besim tek vetja”, u shpreh Muharremaj.
Talenti i tij mori vëmendjen e mediave europiane, të cilat e përgëzuan për performancën dinjitoze. Mediat serbe e sulmuan me artikuj e komente negative pas pjesëmarrjes së tij në “Eurovision”. Gjoni bëri shqiponjën kur Shqipëria i dha 12 pikë, e sipas tyre, ky ishte një provokim, e madje një skandal.
