Shoqata Kulturore Shqiptare “Iliria” në Koper, në bashkëpunim me Ambasadën e Republikës së Sllovenisë në Kosovë dhe me Ministrinë e Punëve të Jashtme dhe të Diasporës së Kosovës, sot, me fillim nga ora 14:00, në amfiteatrin e vogël të Bibliotekës Kombëtare të Kosovës kanë përuruar librin në gjuhën shqipe “Shqiptarët e lashtë dhe krijimi i Istrias” të autorit Peter Štoka, përkthyer dhe redaktuar nga dr. Pëllumb Qazimi.
Kryetari i Shoqatës Kulturore Shqiptare “Iliria”, Heset Ahmeti, i cili ishte moderator i këtij përurimi, foli për aktivitetet e kësaj shoqate në diasporë, kryesisht në Koper të Sllovenisë. Ai tregoi se libri “Shqiptarët e lashtë dhe krijimi i Istrias” i autorit Peter Štoka është botimi i dhjetë i koleksionit “Iliria”, që sjell fakte historike për rolin dhe praninë e shqiptarëve në krijimin e Istrias.
Ahmeti falënderoi të gjitha institucionet, lokale dhe qendrore të Republikës së Kosovës, të Shqipërisë dhe të Sllovenisë, që kanë mbështetur deri më tash aktivitetet e Shoqatës Kulturore Shqiptare “Iliria”. Ai bëri me dije se kontributin shkencor të studiuesve sllovenë dhe shqiptarë do ta përkrahin gjithmonë materialisht dhe do ta përurojnë kudo dhe kurdo që institucionet i ofrojnë bashkëpunim. Gjithashtu, librin e Peter Štokës ai e quajti “monument i vlerave të veçanta historike, kulturore, shkencore për shqipen dhe shqiptarët e hershëm”.
Përkthyesi dhe redaktori i librit, dr. Pëllumb Qazimi, në recensionin për librin, tha se studiuesi Peter Štoka ka bërë një punë shumë të madhe dhe me vlerë për albanologjinë dhe për miqësinë e hershme të shqiptarëve me sllovenët. “Libri i tij është një kontribut i madh për kulturën shqiptare, gjithashtu edhe për raportet e mira të shqiptarëve me sllovenët”, tha studiuesi Qazimi.
Fjalë rasti mbajti edhe ambasadorja e Sllovenisë në Kosovë, Mince Benedejçiq, e cila tha se, pas një leximi të shpejtë që i ka bërë librit në gjuhën angleze, “Shqiptarët e lashtë dhe krijimi i Istrias”, ka vënë re se autori ka sjellë mjaft risi të panjohura më parë nga shqiptarët dhe sllovenët për marrëdhëniet e tyre të ndërsjella.
Ndërkaq autori Peter Štoka paraqiti disa argumente të qëndrueshme dhe të forta, nëpërmjet disa artefakteve në fotografi, për prejardhjen e shqiptarëve dhe për vjetërsinë e gjuhës shqipe. Ai tha se gjuha shqipe dhe kultura e saj janë shumë të vjetra dhe kanë gjurmë të mëdha e të dukshme në shumë fshatra dhe qytete të Sllovenisë.
