Gjatë diskutimit për legalizimin e lojërave të fatit kërkuar në unison nga federatat sportive në vend për qeverinë, kryeministrit Edi Rama shpjegoi sesi do të funksionojë kjo skemë.
Ai madje iu rikthye debatit të fortë politik që ndodhi pas operacionit “Fundi i marrëzisë”, ku opozita sipas tij pretendonte se ligji i ri i lojërave të fatit u bë për të favorizuar kompaninë online të vëllait të kryeministrit Olsi Rama.
“Dua të bëj një gjë të qartë. Të gjitha argumentet, edhe eksperienca pas mbylljes flasin për një pamundësi për ta kufizuar dhe për vajtjen e përfitimeve në portofole individësh që jo në një rast, por në shumë raste ka profil kriminal. E sjell në kujtesë sepse debate kur u mbyllën lojërat, pati një momenti diskutimi sepse ne ishim që atëherë skeptik për pjesën e basteve online, mund ta realizonim. Por ju kujtohet që atëherë u ngrit një furi e madhe që kjo po bëhet për Olsi Ramën e ku di unë se kë. Dhe për të mos hedhur në erë një proces shumë të rëndësishëm që ka mbrojtur shumë njerëz që do të ishin viktima të këtij fati, ne e lamë. Ajo që flasim është për baste online”, shpjegoi Rama.
Më tej kreu i qeverisë sqaroi se skema e re e operimit të basteve sportive do të bëhet pa pjesëmarrjen në të, të Ministrisë së Financave, pasi siç Rama shpjegoi, nëse ky dikaster hyn në lojë, atëherë sporti dhe kultura do të ngelen sërish pa para.
FJALA E PLOTË E KRYEMINISTRIT:
Ajo që flasim është për bastet online. Ne nuk flasim këtu për hapje por për marrjen e këtij aktiviteti nga ekonomia e zezë dhe nxjerrjen e këtyre përfitimeve në dritë, se as kina s’arrin dot ta bllokojë megjithëse e ka të ndaluar. Kështu që, ajo që vlen këtu është reflektimi si mund ta ndihmojmë ne sportin më shumë se realisht edhe ne jemi në pozitë. Nuk është çështje dëshire, sepse unë edhe për arsye të background-it tim, por edhe bindjes se sporti dhe kultura janë të pazëvendësueshme edhe për ekonominë, është e pamundur që ne t’i përgjigjemi kërkesave tuaja, që për hir të vërtetës janë modeste. Është ngërc i madh, por për të shkuar në një hap të madh më tutje, dhe duke menduar si Luiza të mos jetë një meteor, por të ketë 1,2,3 Luiza të tjerë në të ardhmen që të rrisin numrin e sportistëve kampionë, që peshëngritja të lulëzojë, por që edhe ën futboll. Se jemi shumë mbrapa në infrastrukturë, na duhet financim për të gjithë sistemin e trajnerëve dhe infrastrukturës. Kështu, që duhen para.
Dhe besoj se është e arsyeshme dhe fisnike që këto para t’i vëmë në dispozicion. Arsyeja tjetër pse Ministria e Financave nuk është në panel, është sepse ne kemi sot një pjesë që u la që atëherë të licencuar të aktivitetit të kazinove vetëm në hotelet me 5 yje që është rezultat i nevojës për të stimuluar turizmin elitar në ekonomi. Se hotelet me 5 Yje sjellin një lloj tjetër konsumatori, një konsumator që del nga hoteli, që shkon te plaza në Durrës, te kalaja e Tiranës, merr taksinë, makinën me qera. Është një lloj konsumatori që shpenzon dhe aty kemi një sasi të ardhurash që janë të konsiderueshme për buxhetin e shtetit.
Dhe Ministria e Financave mezi pret që të jetë këtu se paratë i do në buxhetin e shtetit dhe që pastaj të ngelet prapë sporti ose kultura. Ne do ta bëjmë të sanskionuar, që këto të ardhura, të llogaritura të jenë shumëfish më shumë seç ne kontribuojmë në vit për sportin, të shkojnë për sportin, kulturën dhe rininë në mënyrë të dedikuar. Pjesën e luanit do ta marri lëvizja sportive.
Kështu që do e shohim me shumë pozitivitet këtë gjë. Do vendosim kushte shumë të forta dhe do të bëhet me kompani ndërkombëtare. Nuk do të lejojmë riciklimin e asnjë lloj gjëje që nuk sjell këtu kulmin e transparencës dhe ligjshmërisë. Këto janë kompani të licencuara ndërkombëtarisht në tregun europian. Evisi më tha hë si do bëhet po apo jo. Edhe i thashë do shohim dhe do procedojmë.
