Në Beograd, po mbahet takimi i nismës rajonale për bashkëpunim “Ballkani i hapur”. Presidenti i Serbisë, Aleksandar Vuçiç, është pritësi i kryeministrit e Shqipërisë, Edi Rama, dhe zëvendëskryeministrit të Maqedonisë së Veriut, i ngarkuar për Çështje Evropiane, Nikola Dimitrov.
Gjatë fjalës së tij në konferencën e përbashkët për shtyp, kryeministri Edi Rama është shprehur se kjo nismë i mirëpret të gjithë shtetet që duan të bashkohen.
“Procesi i Berlinit ka mbetur në rrugë nga një samit në tjetrin. Në pamundësi për të zbatuar ato që thuhet është krijuar kjo nisëm dhe është një njësi e zbatimit të procesit të Berlinit duke përshpejtuar dhe njëkohësisht duke monitoruar zbatimin. Ballkani i hapur është për të gjithë dhe ndryshe nga Procesi i Berlinit nuk merret peng nga asnjë vend. Përcakton qartë se cilido prej vendeve nuk ka nevojë të pres të tjerët sikur jemi karikatura e Këshillit Europian. Kemi ripërcaktuar për të gjithë ata që nuk duan ta kuptojnë që Ballkani i Hapur është gjithëpërfshirës dhe është i të gjithëve. As Shqipëria as Maqedonia as Serbia nuk do presin që të binden të gjithë të tjerët. Arsyet pse janë skeptik i kam dëgjuar edhe arsye e Malit të Zi edhe të Bosnjës edhe Kosovës. Por i konsideroj arsye të mos arsyes. Thatë se duken interesa ekonomike të këtyre vendeve. Po patjetër që do jem këtu për interesat e Shqipërisë. Fuqizohen nga Ballkani i Hapur” tha Rama.
Më tej Rama ka theksuar se bizneset e Malit të Zi, Kosovës apo Bosnje Hercegovinës do të duan të bashkohen me Ballkanin e Hapur para qeverive të tyre.
“Në dhjetor në samitit në Tiranë kur të dorëzojmë sipërmarrësve që takuam sot dhe që kanë ndërveprim. Çfarë kemi konkluduar si zbatim i procesit të Berlinit dhe kur ti përfshimë në një kanal jeshil po ju them që kompanitë nga Mali i Zi nga Bosnja dhe Kosova, do vijnë para se qeveritë e tyre të përfshihen në rrjetin e lëvizjes për të mos pasur probleme. Si kompani, mos u çudisni. Është një kërkesë për ekonomi dhe për qytetarët.
Çfarë është arritur deri më tani?
Në kuadër të kësaj nisme, është vendosur lëvizja e lirë e qytetarëve me letërnjoftim ndërmjet Serbisë, Maqedonisë së Veriut dhe Shqipërisë, është nënshkruar marrëveshja për bashkëpunim në parandalimin dhe eliminimin e pasojave të fatkeqësive natyrore. Po ashtu, janë nënshkruar marrëveshje për bashkëpunim në lehtësimin e importit, eksportit dhe lëvizjes së mallrave në Ballkanin Perëndimor, si dhe një Memorandum mirëkuptimi dhe bashkëpunimi për qasje të lirë në tregun e punës.
Ndërmjet Serbisë, Maqedonisë së Veriut dhe Shqipërisë është rënë dakord që kontrollet kufitare të hiqen nga 1 janari i vitit 2023. Po ashtu, është planifikuar që gradualisht të krijohet një treg i përbashkët për 12 milionë banorë, aq sa kanë banorë këto tri shtete së bashku – pra, të krijohet një “zonë e vetme ekonomike”.
