Disa litra ngjyrë e bardhë, është hedhur sot mbi muralin e kriminelit të luftës, Ratko Mlladiç.
Murali, që është në rrugën “Njegosh” në Beograd, është dëmtuar nga zyrtari i Partisë Socialdemokrate, Gjorgjo Zhujoviq.
“Murali me fytyrën e Mladiçit paraqet një njollë në fytyrën e çdo qytetari të Serbisë. Të gjithë ata që po përpiqen ta mbrojnë atë mural, po na bëjnë një shërbim të keq të gjithëve,” tha Zhujoviq për “Nova”.
Mlladiç është i dënuar nga Tribunali i Hagës me burgim të përjetshëm për krimet dhe gjenocidin në Bosnjë-Hercegovinë ndaj popullatës joserbe. Në Beograd gjendet edhe murali i kriminelit tjetër të luftës, Radovan Karagjiç. Edhe ai është i dënuar me burgim të përjetshëm nga Tribunali i Hagës.
Autoritetet serbe në asnjë rast nuk kanë ndërhyrë t’i fshijnë këto murale, ndonëse nga shoqëria civile dhe organizata të ndryshme kanë bërë thirrje për këtë.
Ndërkohë, Zhujoviq është i njohur për konfrontimet me forcat radikale e joperëndimore në Serbi. Ai pati konfrontim të ashpër me herët edhe me radikalët e Vojislav Sheshelit, një tjetër i dënuar nga Tribunali i Hagës për krime lufte.
Ministria e Brendshme e ndaloi tubimin dhe vendosi policinë për të ruajtur muralin. Por dy aktiviste femra, Aida Coroviç dhe Jelena Jacimovic, hodhën vezë ndaj saj dhe u arrestuan të dyja.
Ata u liruan të martën në mbrëmje dhe iu bashkuan një proteste që u mbajt në qendër të qytetit kundër arrestimit të tyre dhe muralit të Mlladiç. Protestuesit marshuan drejt bashkisë së Vraçarit, ku ndodhet murali, por policia me mburoja kundër trazirave ngriti një kordon për t’i penguar ata të afroheshin.
