Presidentja e Kosovës, Vjosa Osmani, ka kërkuar nga shtetet pjesëmarrëse në Samitin Vjetor të Procesit të Bashkëpunimit të Evropës Juglindore (SEECP) që nuk e kanë njohur Kosovën që ta bëjnë këtë.
Siç ka njoftuar Presidenca, Osmani ka folur mbi sfidat e rajonit, procesin e integrimit në BE dhe mbi mundësitë e bashkëpunimit rajonal.
“Në mënyrë të veçantë ajo foli për rolin që Republika e Kosovës po luan në krijimin dhe ruajtjen e paqes dhe të stabilitetit në rajon. Duke e falënderuar organizatorin e sivjetmë, Turqinë, për organizimin e samitit të sivjetmë, Presidentja Osmani u shpreh e lumtur që vitin e shkuar, si vend nikoqir, Kosova ia doli ta organizonte samitin e SEECP-së, megjithë sfidat e jashtëzakonshme me të cilat u ballafaquam për shkak të pandemisë Covid-19. Duke folur për rëndësinë e bashkëpunimit rajonal, ajo theksoi se bashkëpunimi është i domosdoshëm, por duhet të zhvillohet duke respektuar njëri-tjetrin”, thuhet nga Presidenca.
Osmani në fjalimin e saj ka thënë se e ardhmja e Kosovës është Bashkimi Evropian dhe NATO.
“Bashkëpunimi rajonal është i domosdoshëm, por edhe i mundur, nëse mbështetet në njohje dhe respektim të njëri-tjetrit. Duhet t’i vazhdojmë këto përpjekje. Ne kemi sfida të ngjashme, por mund të ndikojmë në krijimin e një ambienti më të sigurt dhe në rritjen e sigurisë dhe të stabilitetit në rajon”, tha ajo. “Republika e Kosovës ka krijuar besim të qartë se integrimi euroatlantik është synim i qytetarëve të saj, por ne duam të sigurohemi që ky proces do të përshpejtohet, për ta garantuar paqen dhe stabilitetin në rajon, por edhe për ta rritur mirëqenien e qytetarëve të rajonit. E ardhmja jonë është në Bashkimin Evropian dhe në NATO. Integrimi euroatlantik nuk përbën vetëm një alternativë për ne, ai parqet rrugën e vetme përpara”.
Osmani ka thënë se përkushtimi i Kosovës ndaj integrimeve duhet të njihet edhe nga Bashkimi Evropian. Ajo ka thënë se BE-ja duhet ta mbajë premtimin për liberalizimin e vizave.
“Por, përkushtimi ynë ndaj integrimeve duhet të njihet nga Bashkimi Evropian. Siç po lëvizim ne me shpejtësi drejt integrimit të vendit tonë, duke i përmbushur të gjitha kërkesat e parashtruara ndaj nesh, edhe Bashkimi Evropian duhet ta vlerësojë angazhimin e qytetarëve të Kosovës dhe ta mbajë premtimin për liberalizim të vizave për qytetarët e vendit tonë, por edhe për integrim më të shpejtë të të gjitha vendeve të rajonit në BE”, tha Osmani.
