Agron Shehaj ka falenderuar të gjithë qytetarët që kanë shprehur besimin te ai personalisht, në mënyrë të veçantë votuesit e njësisë 5 dhe 7, të cilët i dhanë PD-së 9000 vota më shumë se në vitin 2017.
Agron Shehaj përflitet si një nga kandidatët për karrigen e kreut të Partisë Demokratike pas pakënaqësive që kanë përfshirë kampin demokrat, duke qenë se zgjedhjet e 25 prillit nuk dolën ashtu siç priteshin.
Shehaj , në një mesazh në Facebook, i siguroi votuesit se vota për PD-në nuk është një votë e humbur, pasi kjo votë do të përfaqësohet denjësisht në parlamentin shqiptar.
Postimi:
Dua t’ju falenderoj sinqerisht të gjithë ju që votuat Partinë Demokratike në Tiranë dhe veçanërisht në Njesinë 5 dhe 7, ku pata nderin të punoj bashkë me demokratët. Mbi 9 mijë vota më shumë se në vitin 2017, në këto dy njesi, janë një besim i madh për partinë tonë.
Si çdo demokrat do dëshiroja që sot të kishim marrë mundësinë për të venë në jetë angazhimet që morëm para gjithë shqiptarëve pēr t’u dhënë atyre një qeveri të përgjegjshme që punon për njerëzit.
Por vota juaj për Partinë Demokratike nuk është e humbur, ajo do të përfaqësohet besnikërisht dhe me kurajo në Kuvendin e Shqipërisë, që mbi të gjitha u takon shqiptarëve të thjeshtë.
U jam gjithashtu mirënjohës dhe ndihem përgjegjës ndaj të gjithë juve që shprehët besim tek unë personalisht. Do ta tregoj me punë, çdo ditë, se jam në politikë për ju dhe për t’i shërbyer me nder interesit publik.
Faleminderit!
