Lulzim Basha ka reaguar për herë të parë pas dorëheqjes që dha një ditë më parë nga posti i kryetarit të Partisë Demokratike.
Gjatë një postimi në rrjetet sociale, Basha kujton ditën e parë të demokracisë në Shqipëri ku PD-ja më 22 mars të vitit 1992 fitoi zgjedhjet e para pluraliste.
Në reagimin e tij, Basha thekson se sot, pas 30 vitesh, shqiptarët meritojnë një Parti Demokratike të fortë dhe parimore që shikon vlera drejt së ardhmes.
Lulzim Basha: 30 vjet më parë shqiptarët zgjodhën Partinë Demokratike, zgjodhën të ardhmen dhe fituan lirinë dhe demokracinë, duke përmbysur një herë e përgjithmonë diktaturën komuniste. Rrugëtimi ynë ka qenë i gjatë dhe i vështirë, me suksese që kanë shënuar për mirë jetën e shqiptarëve, dhe dështime që na kanë ndarë nga ajo shumicë dërrmuese shqiptarësh që në 1992-shin i dhanë jetë ëndrrës për një Shqipëri europiane.
Në dekadën e tretë të asaj fitoreje historike, demokratët ndodhen përpara betejës për një Parti Demokratike të së ardhmes, të bashkuar mbi vlerat me të cilat kemi lindur, si shpresa e vetme e shqiptarëve për një të ardhme më të mirë. Ata sot meritojnë dhe do të kenë një Parti Demokratike të fortë, parimore, në krah të njerëzve dhe të aleatëve strategjikë, e gatshme per t’u përballur dhe për të fituar mbi të keqen që i ka zënë frymën vendit. Gëzuar ditën e parë të demokracisë!
