Kryeministri Edi Rama publikoi pamje nga Parku Drilon-Tushemisht, ku ka përfunduar Qendra e re e Vizitorëve, një element që, sipas tij, plotëson mozaikun e atraksioneve që ofron ky kompleks natyror dhe turistik në juglindje të vendit.
Në një postim në rrjetet sociale, Rama theksoi se projekti i parkut është përzgjedhur ndër 8 finalistët e Bienales Ndërkombëtare të Peizazhit të Barcelonës, një prej ngjarjeve më të rëndësishme ndërkombëtare në fushën e arkitekturës së peizazhit. Parku Drilon-Tushemisht u përzgjodh mes 230 projekteve nga 20 vende të botës.
Projekti Drilon-Tushemisht Waterscape Park” është realizuar nga Ministria e Mjedisit dhe AADF. Restaurimi i qendrës së re të vizitorëve në parkun Drilon-Tushemisht, dhe përfundimi i projektit për zbatimin e Biosferës së Prespës janë investime të rëndësishme me ndikim në ekonominë dhe turizmin e zonës.
Projekti njihet si një model i restaurimit ekologjik, ringritjes së habitateve dhe zhvillimit të turizmit të përgjegjshëm, duke kontribuar në rritjen e vizibilitetit të Shqipërisë në nivel ndërkombëtar dhe promovimin e natyrës si atraksion turistik.
