Na Ishte Dikur nderon sot lindjen e një prej figurave më të shquara të Rilindjes Kombëtare Shqiptare, Bajo Topulli, i lindur më 9 korrik 1872 në Gjirokastër.
Qysh 11 vjeç, Bajo u nis për studime në Stamboll, ku u formua me idetë përparimtare të rilindasve të mëdhenj si Frashërit e Jani Vreto. Më pas, ai u bë një prej propaganduesve më të vendosur të gjuhës shqipe në Selanik dhe Manastir, ku shërbeu si pedagog dhe nëndrejtor në gjimnaz.
Në vitin 1905, themeloi Komitetin për Lirinë e Shqipërisë, një organizatë me qëllim zgjimin e ndërgjegjes kombëtare dhe përhapjen e dijes shqipe, përmes librave dhe veprimtarisë atdhetare.
Bajo Topulli ishte pjesë e çetave të para çlirimtare, i njohur edhe si “Garibaldi i Shqipërisë”, duke iu kundërvënë zgjedhës osmane dhe terrorit grek. Pas vrasjes së Dhespotit të Korçës për të hakmarrë vrasjen e Papa Kristo Negovanit, ai u detyrua të largohej jashtë vendit dhe vazhdoi veprimtarinë patriotike në Sofje, Bukuresht, Evropë e SHBA, krah Fan Nolit.
Në Kongresin e Manastirit (1908), u zgjodh anëtar i Komisionit të Alfabetit, duke mbështetur alfabetin me gërma latine, i cili do të përdorej zyrtarisht për gjuhën shqipe.
Pas shpalljes së Pavarësisë, ai jetoi për një kohë në Turqi, ku mbajti poste të larta nën administratën e Mustafa Qemalit (Ataturkut). Në vitin 1925 u kthye në Gjirokastër, ku u zgjodh kryetar i bashkisë, duke ndërmarrë reforma të rëndësishme shoqërore, arsimore e qytetare.
Bajo Topulli ndërroi jetë më 24 korrik 1930, duke lënë pas një trashëgimi të paharruar në kujtesën kombëtare shqiptare.
“Jo me lot grarie do ta varrosim… Ne do ta varrosim si burra.”
— Eqerem Çabej, në fjalën e lamtumirës për heroin e Rilindjes.
