Festivali ikonik i Prishtinës “Sunny Hill” do të organizohet në Tiranë për herë të parë.
Këtë lajm e bëri të ditur vetë Dukagjin Lipa, ditën e djeshme me anë të një postimi. Lajmi i mirë është që kryeqyteti ynë do të mirëpresë këtë festival të rëndësishëm, duke sjellë disa nga emrat më të njohur të muzikës botërore të cilët do të performojnë.
Mirëpo, prej shumë vitesh tashmë ky event organizohej në Kosovë dhe ky vendim nuk është pritur mirë. Gjatë ditës së sotme ka pasur reagime të shumta nga artistët kosovarë. Jo vetëm kaq, së fundmi edhe disa nga emrat më të rëndësishëm të politikës së Kosovës kanë reaguar.Memli Krasniqi, Lumir Abdixhiku, Besnik Tahiri, Vlora Çitaku dhe Lutfi Haziri janë disa prej politikanëve që kanë reaguar në lidhje me anulimin e “Sunny Hill”.
Në reagimin e tij në Facebook, Memli Krasniqi deputeti i Kuvendit të Kosovës dhe njëherësh kryetar i Partisë Demokratike të Kosovës, u shpreh se e gjitha kjo erdhi si pasojë e mosfunksionimit të qeverisë.
“Në secilin shtet tjetër të botës, një artiste kulmore si Dua Lipa, do të trajtohej si aset e pasuri. Por, fatkeqësisht, jo edhe në Kosovë.Është krejt e pabesueshme, por, Qeveria po e përzë nga Prishtina një ndër iniciativat më të mëdha dhe të suksesshme artistike, “Sunny Hill” Festival.
Lëvizja Vetëvendosje dhe Albin Kurti i mbyllën derën të vetmit festival të muzikës me përmasa botërore në vendin tonë. Ky veprim, më shumë se gjithçka, tregon për xhelozinë e sëmurë, injorancën e thellë, e kompetencën e munguar të komplet një Qeverie e cila secilën ditë po na sjell një skandal më të madh se tjetrin. Turp,”-shkruan Krasniqi.
Nga ana tjetër me rezerva të mëdha për qeverinë e Albin Kurtit është shprehur edhe Lumir Abdixhiku i cili mban postin e kryetarit të Lidhjes Demokratike të Kosovës.
“Kjo Qeveri nuk di të krijojë e ndërtojë, por ajo nuk i lejon as të tjerët të krijojnë e ndërtojnë. Sot, refuzimi paranoik i pushtetit të Kurtit i dha goditjen më të rëndë të mundshme jetës kulturore në Prishtinë e Kosovë.Detyrimi për largim i festivalit “Sunny Hill”, ngjarjes që vendoste Kosovën në hartën kulturore botërore, është skandal i pariparueshëm për vendin tonë. Largimi i shtëpisë verore të artistëve më me nam në botë, është shuarje e mundësisë për të rinjtë e të rejat tona që megjithatë afër vetes kishin një ngjarje që shumë shtete do ta donin. Shteti ynë paranoik këtë ngjarje nuk e do.
Ata bënë çmos të refuzojnë vendimin e qeverisjes së LDK-së në asamblenë e kryeqytetit për të mbajtur një ngjarje si kjo në Kosovë përherë. Kjo politikë paranoike, është vazhdimësi e zymtësisë politike që popullistët e pushtetit në çdo hap të tyre po e prodhojnë. Këtë Kosovë të shpërfytyruar të tyre, qytetarët tanë nuk e meritojnë,”-reagon Abdixhiku.
Mesa duket anullimi i festivalit “Sunny Hill” nxorri në pah ankesat e zyrtarëve kosovarë mbi mosfunksionimin e qeverisë së vendit të tyre.“Dorëheqje për ‘Qeverinë Breshka”, shkruan ndër të tjera në postimin e tij – shefi i Grupit Parlamentar të Aleancës për Ardhmërinë e Kosovës, Besnik Tahiri.
“Sot, paradite fola për vendimmarrjen shumë të ngadalshme të Qeverisë së Kosovës, kabineti qeveritar më kqyrke çka po them!Tash që edhe deklarata zyrtare që në mungesë të ekspedivitetit dhe dinamikës së mirëfilltë në punë, e humbëm një festival që e patëm në promovim të Kosovës – atë të Sunny Hill. Shkoi në Tiranë!Me këtë qasje totalisht fëmijërore dhe joserioze, se di ku është nisur kjo qeveri. Dorëheqje për ‘Qeverinë Breshka”,”-përfundon Tahiri.
Ka pasur edhe një reagim nga nënkryetarja e PDK-së, e cila e quajti anullimin e festivalit një sabotim të qëllimshëm të qeverisë.
“Dua Lipa është yll botëror! I mbushë stadiumet kudo në botë. Secili kryeqytet në botë kish me e pasë lakmi Sunny Hill Festival. Ama bash secili. Hiq ma larg se para pak ditësh, Kryeministri i Luksemburgut na foli në Dublin për Duan, Dugin, dhe dëshirën e tij për të ardhë ne festival në Prishtinë. Bile, me mburrje na e tregonte një foto me yllin tonë.
Kosova ka nevojë për Duan, jo Dua për ne. Dështim dhe sabotim i qëllimshëm nga ana e Qeverisë”-shkruan Vlora Çitaku.
Ndërkaq me doza më të zbutura është shprehur edhe nënkryetari i Lëvizjes Demokratike të Kosovës, i cili thotë që një festival i një kalibri të tillë nuk duhej lënë të ikte nga duart, dhe kjo ishte një detyrë e komunës.
“Është e drejtë e Komunës me e dhënë tokën në shfrytëzim për një Festival qysh është Sunny Hill. Po ashtu, është e drejtë e Komunës dhe detyrë me e mbrojtë Sunny Hillin, me e mbajtë në vendlindje. Hajde Përparim, na prijë, krejtve na ki mbrapa kësaj pune. Besoj edhe krejt elitën kulturore të Prishtinës. Është mëkat me e lëshu me ik prej Prishtinës këtë vlerë, me përmasa ndërkombëtare,”-përfundon Lutfi Haziri.
