Nga Korça ku vizitoi Myftininë e këtij qyteti për të mbështetur nismën për dhurimin vullnetar të gjakut, Presidenti Ilir Meta ka replikuar me komentet e fundjavës së bëra nga kryeministri Edi Rama për sa i përket çështjes së detit me Greqinë.
“Kemi Kushtetutë, kemi vendim të veçantë të Gjykatës Kushtetuese për këtë çështje dhe autorizimet që janë dhënë [për negociatat] janë në përputhje me këtë vendim, çdo veprim individual nuk përfaqëson Shqipërinë,” – tha Meta.
Në fundjavë kryeministri u shpreh se 12 miljet detare të pretenduara nga Greqia, “janë e drejtë e pretenduar nga gjtihsecili shtet, qoftë dhe nga Shqipëria”, mirëpo rrethanat gjeografike e ndërlikojnë këtë gjë.
Presidenti iu shmang komenteve direkte për sa i përket deklaratave të kryeministrit Edi Rama për listat e kandidatëve apo ligjin e dekriminalizimit, por theksoi se qytetarët meritojnë përfaqësues “sa më me integritet”.
“Zero koment për zero-zeron! Edhe të merresh me kumar dhe të citosh biblën nuk shkojnë këto gjëra,” – tha Presidenti për sa i përket të ashtuquajturave “7 mëkatet kapitale të Biblës”, të cilat sipas një deklarate bërë nga ish-Kryeministri Fatos Nano në një intervistë televizive, ai i mëshiron.
