Qeveria shqiptare është në favor të rinovimit të një traktati miqësie dhe bashkëpunimi të vitit 1996 me Greqinë për pesë vjet të tjerë, thanë të hënën burime diplomatike greke.
Lajmi është konfirmuar nga media greke “Kathimerini” , e cila në një shkrim të publikuar sot thotë se “Marrëveshja e Miqësisë, Bashkëpunimit, Fqinjësisë së Mirë dhe Sigurisë u nënshkrua mes dy vendeve më 21 mars 1996 dhe kishte një kohëzgjatje fillestare 20-vjeçare, nga dita e zbatimit të saj, e cila përfundoi në vitin 2018. Më pas ajo u rinovua për një periudhë pesëvjeçare vjet, deri në vitin 2023”.
Me këtë traktat Athina dhe Tirana shpallën paprekshmërinë e kufijve, respektimin e sovranitetit, të drejtave individuale, minoriteteve dhe emigrantëve, ndërsa theksuan perspektivën evropiane të të dy vendeve.
“Ky zhvillim është pjesë e përmirësimit të vazhdueshëm të klimës në marrëdhëniet mes dy vendeve, gjë që u dëshmua gjatë vizitës së ministrit të Jashtëm Nikos Dendias në Tiranë në tetor 2020, si dhe takimit të tij të fundit me kryeministrin shqiptar Edi Rama në Tiranë disa ditë”, shkruan gazeta greke.
Kathimerini vijon me tej duke shkruar se të dy vendet rihapën negociatat në maj 2018 për përcaktimin e kufijve detarë në detin Jon dhe zgjidhjen e çështjeve të tjera dypalëshe.
Në tetor 2020, ata njoftuan se kishin rënë dakord për zgjidhjen e mosmarrëveshjes mbi kufijtë detarë në Deti Jon në Gjykatën Ndërkombëtare të Drejtësisë.
Greqia dhe Shqipëria kishin nënshkruar një marrëveshje për kufirin detar në vitin 2009, por ajo u kundërshtua në Gjykatën Kushtetuese të Shqipërisë, e cila e anuloi marrëveshjen pothuajse një vit më vonë.
