Enver Hoxhaj, i zgjedhur nga partia e tij edhe si kandidat në zgjedhjet presidenciale të Kosovës, u shpreh pas takimit me kreun e PD, Lulzim Basha, se lufta e UÇK-së është themel i lirisë dhe pavarësisë së Kosovës, ndaj dhe e gjithë politika kosovare e shqiptare duhet të bashkohet në mbrojtje të saj.
Hoxhaj falenderoi Bashën për mbështetjen që i ka dhënë Kosovës, duke vlerësuar bashkëpunimin me të, kur të dy ishin në krye të diplomacive të dy vendeve.
“Është kënaqësi e veçantë që takoj sot kryetarin e PD, z. Basha. E falënderoj z. Basha për mbështetjen që i ka dhënë Kosovës. Kemi pasur bashkëpunim shumë të mirë me të, edhe si ish-ministra të Jashtëm, edhe kur isha ministër i Arsimit. E kemi pasur bashkëpunimin e parë në mars të 2008, kur bëmë përpjekje që të marrim sa më shumë njohje për Kosovën. Asnjëherë s’e kisha menduar që në 2020 Kosova e pavarur do të kishte një vit të vështirë, që përveç pandemisë, morëm dhe goditje nga Gjykata Speciale. Ne mendojmë se të gjithë faktorët politikë në Shqipëri duhet të japin mbështetje maksimale. Lufta e drejtë e UÇK është themel i lirisë dhe pavarësisë sonë. Mund të ketë situata që kjo gjykatë të përdoret në të ardhmen në raport me të ardhmen e Kosovës”, deklaroi Hoxhaj.
Ndërsa në fjalën e tij, kryedemokrati Lulzim Basha u shpreh se diplomacia shqiptare duhet të jetë tërësisht në dispozicion dhe mbështetje të Kosovës, përkundrejt çdo synimi dhe ambicie personale në kurriz të qytetarëve.
Lideri i opozitës tha më tej se Kosova dhe Serbia duhet të kenë njohje të ndërsjelltë, si parakusht për proceset stabilizuese dhe integruese në Ballkan. “Duhet të insistojmë për heqjen e vizave për Kosovën dhe për integrimin në NATO dhe në Bashkimin Evropian”, – theksoi Basha.
Delegacioni i PDK që po viziton Tiranën përbëhet nga Enver Hoxhaj në cilësinë e ushtruesit të detyrës së kryetarit të PDK, Xhavit Haliti, nënkryetar i PDK-së, Uran Ismajli Sekretar i PDK-së si dhe Bashmir Xhemaj drejtor i komunikimit të PDK-së.
