Nga 1 janari 2021, shërbimi i kolaudimit të automjeteve nuk do të ofrohet më nga privati, por do t’i kalojë shtetit. Kjo pasi më 31 dhjetor përfundon kontrata e koncensionit për këtë shërbim me kompaninë SGS Albania.
Automatikisht më pas, shërbimi do të ofrohet për të gjithë qytetarët nga Drejtoria e Shërbimit dhe Transportit Rrugor. Nëpërmjet një urdhri të firmosur nga ministrja e Infrastrukturës dhe Energjisë, Belinda Balluku, i kërkohet kompanisë koncesionare që të dorëzojë mjediset dhe infrastrukturën përkatëse.
Urdhri ngarkon Drejtorinë e Shërbimit të Transportit Rrugor që të marrë në dorëzim asetet, që janë qendrat e kontrollit teknik, si dhe pajisjet dhe kërkohet që transferimi të kryhet brenda datës 31 dhjetor 2020.
Kontrata koncesionare për shërbimin e kolaudimit të mjeteve mes shtetit shqiptar dhe kompanisë SGS Albania ishte me afat 10-vjeçar. Ajo përfundoi në shtator të vitit të kaluar, por qeveria vendosi ta shtyjë edhe me 16 muaj të tjerë vlefshmërinë e saj, duke lënë si afat të dytë 31 dhjetorin. Nga 1 janari, shërbimi do t’i kalojë shtetit.
Ndërkaq, në buxhetin 2021, të miratuar vetëm pak javë më parë nga Parlamenti, në tabelat shoqëruese theksohet se vitin e ardhshëm parashikohet dhënia me koncesion e këtij shërbimi dhe më saktësisht, e infrastrukturës së bazës së të dhënave dhe mbikëqyrjes së qendrave të kontrollit teksnik të mjeteve rrugore./A2
