Doktori shumë i famshëm i grave, Halim Kosova, ish ministër dhe ish kandidat i PD-së për Bashkinë e Tiranës, është shfaqur në televizionin Top Channel, si i ftuar special, ku ka artikuluar një mori kritikash ndaj Partisë Demokratike dhe liderit të partisë, Lulzim Basha.
Konkretisht Kosova, artikuloi kritika për Genc Rulin, Bujar Nishanin dhe vetë kryetarin Basha, duke e quajtur të padrejtë mënjanimin e tij në komisionin për vlerësimin e figurave në PD.
Kosova bëri edhe deklarata lidhur me biseda private që ka zhvilluar me këta persona, madje foli edhe për raste, ku sipas tij, përfaqësues të PD-së kanë ndikuar për të evituar ndëshkimin e korrupsionit… Nuk dihet përse doktori i njohur i grave, nuk i ka denoncuar më parë këto akte kaq kriminale.
Deklaratat e Kosovës, shkaktuan jo pak habi, veçanërisht kur ai tha se mund ta bashkëpunojë edhe me Edi Ramën nëse do të thirret nga ai, sepse sipas Kosovës, sistemi shëndetësor ka nevojë për reformë që nuk lidhen me partitë konkrete.
Doktori dukej mjaft i gëzuar, për vlerësimin që Edi Rama i ka bërë dikur, duke e shpallur si personalitet të Tiranës.
“Jam I bindur që PD nuk më lëshon kollaj, por cfarëdo partie të më ftonte, unë do të isha i gatshëm të jepja kontributin tim!
…Edi Rama, më ka vënë ndër personalitetet e vitit në Tiranë. Nuk do ta harroj se kur erdhi rradha ime, tha e ka rradhën Halim Kosova, unë llogarita hapat dhe ai foli aq shumë se kisha arritur në podium. Unë qesha dhe thashë do të më falësh, se m’u duk vetja si fëmijë prematurë. Ai ka bërë vlerësime maksimale për punën time.
Kur u nxeha njëherë në PD, thashë është e pafalshme që më shumë të më vlerësojë Edi Rama, që nuk është këtu se sa ju”, tha ndër të tjera Kosova.
Kosova tha se i “dhimbsen” demokratët sepse kanë përfunduar “në pikë të hallit” dhe se ai ka vlerësim maksimal për Sali Berishën.
“Demokratët duhet të fitojnë. Janë katandis aq keq, sa më dhimbsen. I kanë mbytur hallet, do të më pëlqente të fitonte si forcë“, tha ndër të tjera Kosova, kur u pyet a do t’i fitojë zgjedhjet Lulzim Basha.
