“AstraZeneca fsheh 30 milionë doza vaksinash në Itali”, kështu shkruhet në artikullin e gazetës ‘La Stampa’. Sipas gazetës italiane, ka më shumë se 29 milion doza të vaksinës AstraZeneca, të cilat thuhet se janë në një industri jashtë Romës, në rajonin e Annani, dhe jo të destinuara për tregun evropian, por për Britaninë.
‘La Stampa’ shkruan se ky “thesar” ishte gjetur nga autoritetet evropiane, të cilët njoftuan ato italiane. E gjithë çështja doli në dritë, pas një inspektimi të kompanisë në Halix, nga Komisioneri i Tregut të Brendshëm Thierry Breton, i cili u interesua se ku po shkonin dozat që po prodhoheshin në Holandë.
Ky zbulim vjen ndërsa “AstraZeneca” është kritikuar ashpër nga Komisioni Evropian për mungesat e dërgesave të vaksinave, duke mos mbajtur premtimin që në tremujorin e parë të vitit të dorëzonte 30 milion doza, një shifër kjo gati e barabartë me shumën e gjetur.
